«Լեռնային Ղարաբաղն արնահոսող վերք է». Կադիրովը արյունահեղությունը դադարեցնելու և խաղաղության կոչ է արել Հայաստանին և Ադրբեջանին
Չեչնիայի ղեկավար Ռամզան Կադիրովը հայ և ադրբեջանցի ժողովուրդներին կոչ է արել դադարեցնել արյունահեղությունը՝ առաջարկելով համայն միջազգային հանրությանը ներգրավվել այդ գործընթացում և վերականգնել խաղաղությունն Արցախում:
«Այսօր կրկին տագնապալի լուրեր են ստացվում Ղարաբաղից, Ադրբեջանից ու Հայաստանից: Կոչ եմ անում եղբայրական ադրբեջանցի և հայ ժողովուրդներին դադարեցնել անիմաստ արյունահեղությունը, որը ավելի ու ավելի է հեռվացնում հակամարտությունը ողջամտության և մարդկայնության հասկացողություններից»,-գրել է Կադիրովը:
Ռամզան Կադիրովն այս մասին գրել է իր թելեգրամյան ալիքում:
Նրա խոսքով ՝ Կովկասը մի տարածք է, որտեղ «ապրում են հնագույն մշակույթ ունեցող բազմաթիվ ժողովուրդներ, և նրանց բոլորին միավորում են ազգակից, պատմական և մշակութային արմատները»: Ուստի ցանկացած կովկասցու համար, «հարևանի դժբախտությունը խորթ չէ, դա ուղղակիորեն վերաբերում է նրան: «Չեչեն ժողովուրդը, որը հիանալի գիտի պատերազմի և խաղաղության գինը, կոչ է անում ձեզ դադարեցնել, փոխել ձեր բարկությունը ողջամտության, խոնարհեցնել ձեր հպարտությունը և հայրերին ու մայրերին հնարավորություն տալ տեսնելու իրենց երեխաներին ողջ ու առողջ»:
Նա դիմել է միջազգային հանրությանը՝ առաջարկելով ՄԱԿ-ին, բոլոր հարևան պետություններին, հոգևոր առաջնորդներին ներգրավվել Կովկասում խաղաղության վերականգնման գործընթացում:
«Լեռնային Ղարաբաղն արնահոսող վերք է, որին որոշակի ուժեր ապաքինվելու հնարավորություն չեն տալիս, իսկ այդ ցավից տառապում է ամբողջ Կովկասը: Ռուսաստանն ուղղակի տիտանական ջանքեր է ներդնում, որպեսզի կողմերին ստիպի բանակցային սեղանի շուրջ նստել: Սակայն դրա համար անհրաժեշտ է մեկընդմիշտ դադարեցնել ռազմական գործողությունները»,-ասել է Կադիրովը:
