Այո, պատերազմի սպասում էինք, բայց օրը պարզ չէր. Արայիկ Հարությունյան

Մեզ ընդամենը պետք էր հետեւել Արդբեջանի եւ Թուրքիայի ղեկավարների վերջին ամիսների հայտարարություններին, եւ արդեն պարզ էր, որ այո, պատերազմի սպասում էինք: Այս մասին, այսօր՝ սեպտեմբերի 27-ին, լրագրողների հետ հանդիպման ժամանակ նշեց Արցախի նախագահ Արայիկ Հարությունյանը:

«Իհարկե,  օրը չէր պարզ, բայց Պաշտպանության բանակը հիմնականում առավոտյան ժամը 7-ին պատրաստ էր պատերազմին, եւ այն սկսվեց 7-ի կողմերը»,-ասաց նա՝ հավելելով, որ արդեն ամիսներ ադրբեջանական կողմը F-16-ով իրականացնում են հետախուզական թռիչքներ, ինչը վառ ապացույցն է, որ Ադրբեջանի կողմից պատերազմում են թուրքական զինուժի ներկայացուցիչներ:

Հարցին, թե ինչ կանխատեսումներ կան, որքան կարող է ձգվել պատերազմը, Արայիկ Հարությունյանն ասաց. «Մենք պետք է պատրաստ լինենք բոլոր սցենարներին՝ կարճաժամկետ, միջինժամկետ եւ երկարաժամկետ պատերազմի: Այն, որ պատերազմը լայնածավալ է եւ Ադրբեջանը օգտագործել է իր ամբողջ զինված ուժերն ու ռազմական տեխնիկան, դա ակնհայտ է»:

Ինչ վերաբերում է միջազգային կառույցների, մասնավորապես, ԵԱՀԿ Մինսկի խմբի համանախագահների արձագանքին, Արցախի նախագահն ասաց. «Իհարկե, միջազգային հանրության արձագանքը բավարար չեմ կարող համարել, քանի որ ոչ միայն երեւում է թուրքական զենքի, զինուժի, տեխնիկայի օգտագործում Արցախի դեմ, այլեւ Թուրքիայի կողմից անթաքույց աջակցություն է հայտնվում Ադրբեջանին:

Չեմ կարող համարել բավարար, քանի որ սա արդեն վաղուց արցախա-ադրբեջանական հակամարտության տիրույթից դուրս է վաղուց»: