Պետական տուրք է. Քաղաքապետարանին պատկանող արվեստի դպրոցները ծնողներից պահանջում են վճարել 4 ամսվա չանցկացրած դասերի վճարը

Երևանի քաղաքապետարանին պատկանող արվեստի դպրոցներում սովորող երեխաների ծնողներն ահազանգում են՝ նշելով, որ քաղաքապետարանը պահանջում է վճարել արտակարգ դրության ժամանակ մոտ 4 ամիս չհաճախած դասերի գումարը, որը որոշ դեպքերում կազմում է մոտ 40 հազար դրամ: 

Ծնողներից մեկը, որի երեխան սովորում է Կոնստանտին Օրբելյանի անվան երաժշտական դպրոցում, Auroranews.am-ի հետ զրույցում նշեց, որ քաղաքապետարանի Մշակույթի վարչությունը դա բացատրում է նրանով, որ պետական տուրք է, որը իրենք պետք է վճարեն: 

Ըստ ծնողի՝ քաղաքապետարանը պահանջում է վճարել 4 ամսվա գումարը, իսկ բաց թողած դասերը լրացնել մինչև դեկտեմբեր, հակառակ դեպքում կամ երեխայի հետ միակողմանի կխզվի պայմանագիրը, կամ էլ երեխան չի փոխադրվի հաջորդ խումբ: Ծնողների մտահոգությունը, բացի ֆինանսական բեռի խնդիրը, նաև այն է, թե ինչպես պետք է  երեխաները, հաճախելով հանրակրթական դպրոց, նաև արվեստի դպրոցի լրացվելիք դասերը հասցնեն, քանի այս դեպքում երեխաների ծանրաբեռնվածությունը, կարելի է ասել, եռապատկվում է: 

Auroranews.am-ը հետամուտ կլինի խնդրի բարձրացմանը, և առաջիկայում կփորձենք ներկայացնել նաև քաղաքապետարանի մեկնաբանությունը: