Իշխանական քարոզչամեքենան շրջանառության մեջ դրեց այն թեզը, որի համաձայն Գագիկ Ծառուկյանը կկալանավորվի. Տոնոյան

«Բարգավաճ Հայաստան», «Հայրենիք» և Հայ Հեղափոխական դաշնակցություն կուսակցությունների կողմից հոկտեմբերի 8-ին համապետական հանրահավաք անցկացնելու վերաբերյալ տեղեկատվության տարածումից ընդամենը ժամեր անց իշխանական քարոզչամեքենան շրջանառության մեջ դրեց այն թեզը, որի համաձայն առաջիկա երկու օրերի ընթացքում Գագիկ Ծառուկյանը կկալանավորվի: Այս մասին ֆեյսբուքյան իր էջում գրել է «Բարգավաճ Հայաստան» խմբակցության պատգամավոր Իվետա Տոնոյանը: 

 

«Իսկապես ցավալի է, որ հնչող քննադատությունների վերաբերյալ իշխանությունների հակափաստարկներն այնքան թույլ, սին ու դատարկ են, որ ամեն անգամ գործի է դրվում քաղաքական ընդդիմախոսներին լռեցնելու այլևս իրենց համար սիրելի դարձած կալանավորման գործելաոճը: Մարդկանց կալանավորելով երկրի առջև ծառացած խնդիրները չեն լուծվելու, հարյուր հազարավոր ընտանիքների սոցիալական վիճակը չի բարելավվելու, արտաքին պարտքը չի փակվելու, ներդրումներ չեն գալու ու աշխատատեղեր չեն ստեղծվելու: Իշխանություններն այլևս դարձել են կանխատեսելի իրենց փոքրոգի պահվածքով, երբ անգամ հանրահավաքի անցկացման վերաբերյալ մեկ հայտարարությունից ընկնում են ցնցակաթվածի մեջ: Անհավասարարակշիռ ու քինախնդիր վարքագիծն այլևս իշխանությունների ձեռագիրն է դարձել»,-գրել է Տոնոյանը:

 

Հիշեցնենք, որ լրատվականներից մեկը գրել էր, որ առաջիկայում «Բարգավաճ Հայաստան» կուսակցության ու խորհրդարանում համանուն խմբակցության ղեկաբար Գագիկ Ծառուկյանը կկալանավորվի։ ԵՎ  չի բացառվում, որ դատարանը կալանավորման որոշում հենց վաղը՝ սեպտեմբերի 23 -ին՝ Ծառուկյանի գործով դատական առաջին նիստի ժամանակ կայացնի։ 
 

Քաղաքականություն

Պատահարներ