Ոստիկանները Մասիսում խոշոր չափերի թմրանյութ են հայտնաբերել

Ոստիկանության Մասիսի բաժնի ծառայողները տեղեկություններ էին ստացել, որ Նորամարգ գյուղի 56-ամյա մի բնակիչ տնամերձ հողամասում թմրամիջոց է ապօրինի աճեցնում, պահում և օգտագործում:

Տեղեկությունների իսկությունը ստուգելուց հետո քրեական ոստիկանության գլխավոր վարչության թմրամիջոցների ապօրինի շրջանառության դեմ պայքարի և Արարատի մարզային վարչությունների ծառայողները, Մասիսի բաժնի քրեական հետախույզների հետ, նշված տնամերձ հողամասից հայտնաբերել են կանեփի 7 բույս, իսկ տնից՝ ապակյա տարայով չորացված, մանրացված, յուրահատուկ հոտով բուսական զանգված:

Ոստիկանները կանեփանման բույսի զանգվածներ հայտնաբերեցին նաև տան սեղանին: Միաժամանակ, տանտերը իրավապահներին ներկայացրեց կանեփի ճյուղեր և կանեփից պատրաստված կիսաչոր զանգված:

Ըստ նրա` հայտնաբերվածը կանեփ տեսակի թմրամիջոց է, ինքն է աճեցրել իր օգտագործման համար:

Ոստիկանությունը հայտնում է, որ նշանակվել են փորձաքննություններ:

Նախապատրաստվում են նյութեր:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: