ՌԴ էներգետիկայի փոխնախարարը կալանավորվել է 603 մլն ռուբլու հափշտակության համար
«ՏԱՍՍ» գործակալությունը հայտնում է, որ Մոսկվայի Բասմանի դատարանը 2 ամսով մեկուսարան է ուղարկել ՌԴ էներգետիկայի փոխնախարար Անատոլի Տիխոնովին, որը մեղադրվում է ավելի քան 600 միլիոն ռուբլի հափշտակելու համար:
Ըստ աղբյուրի՝ քննչական կոմիտեն խնդրել էր ձերբակալել պաշտոնյային մինչև նոյեմբերի 8-ը, սակայն Տիխոնովի պաշտպանական թիմը հայտնել է, որ իրենք բողոքարկելու են ձերբակալության մասին որոշումը:
Քննչական կոմիտեն միջնորդությունը հիմնավորել է այն բանով, որ եթե ավելի մեղմ միջոց ընտրվեր, Տիխոնովը կարող էր թաքնվել հետաքննությունից, ճնշումներ գործադրել վկաների վրա, խոչընդոտել քրգործի օբյեկտիվ քննությանը և շարունակել զբաղվել հանցավոր գործունեությամբ:
ՔԿ-ի պաշտոնական ներկայացուցիչ Սվետլանա Պետրենկոն տեղեկացրել է, որ հետաքննությունը հաստատել է մի շարք այլ պաշտոնյաների՝ «ՌԷԱ» ընկերության նախկին տնօրեն Անատոլի Տիխոնովի, նրա խորհրդական Ռոման Ռիժկովի, «Լանիտ» ՓԲԸ-ի փոխնախագահներ Վլադիմիր Մակարովի և Վիկտոր Սերեբրյակովի ներգրավվածությունն առնվազն 603 միլիոն ռուբլու հափշտակմանը: Պաշտոնյաները յուրացրել են տեղեկատվական համակարգի ստեղծման համար հատկացված գումարը:
Նրանք կալանավորված են:
