Ալիևը պաշտոններից հետ է կանչել Վրաստանում և Սերբիայում Ադրբեջանի դեսպաններին

Ադրբեջանի նախագահ Իլհամ Ալիևը Վրաստանում Ադրբեջանի դեսպանի պաշտոնից հետ է կանչել Դուրսուն Հասանովին և նոր դեսպան նշանակել Ֆաիկ Գուլիևին, հաղորդում է minval.az-ը։

Նշվում է, որ Գուլիևն ազատվել է Սփյուռքի հետ աշխատանքի պետական կոմիտեի ղեկավարի տեղակալի պաշտոնից:

Աղբյուրի փոխանցմամբ՝ Ալիևը կարգադրել է նաև Էլդար Հասանովին ազատել Սերբիայում, Չեռնոգորիայում, Բոսնիա և Հերցեգովինայում երկրի դեսպանի պաշտոնից։

Հիշեցնենք, որ Հասանովը նախորդ շաբաթ ձերբակալվել էր Ադրբեջանի հատուկ ծառայությունների կողմից՝ խոշոր չափի բյուջետային միջոցներ յուրացնելու կասկածանքով։

«Ձերբակալվել է Սերբիայում, Չեռնոգորիայում և Բոսնիա և Հերցեգովինայում Ադրբեջանի դեսպան Էլդար Հասանովը: Նա մեղադրվում է բյուջետային միջոցներից խոշոր չափի գումարների ոչ նպատակային ծախսի, փողերի յուրացման և այլ իրավախախտումների համար: Նա ձերբակալվել է քննության շրջանակում` որպես կասկածյալ: Քրեական գործը գտնվում է հետաքննության շրջանակում»,- ասվում է երկրի անվտանգության ծառայության մամուլի հաղորդագրության մեջ:

«Թուրան» գործակալության փոխանցմամբ` Հասանովն Ադրբեջանի նախկին գլխավոր դատախազն է: 

Ավելի վաղ ադրբեջանական ԶԼՄ-ները հաղորդել էին, որ Ադրբեջանում բարձրաստիճան պաշտոնյաների ձերբակալություններ են սպասվում: Քննությունը հայտնաբերել է ֆինանսատնտեսական խախտումներ ինչպես ԱԳ նախարարությունում, այնպես էլ տարբեր երկրներում Ադրբեջանի դեսպանատներում, հյուպատոսարաններում և մշտական ներկայացուցչություններում: