ՀՐԱՏԱՊ. Վերացվում է հավաքների, ցույցերի և զանգվածային միջոցառումների անցկացման արգելքը
Հայաստանում կարող են անցկացվել ցույցեր, երթեր, սակայն դիմակներով և 1.5 մետր սոցիալական հեռավորության պահպանմամբ։ Այս մասին քիչ առաջ կառավարության նիստի ժամանակ ասաց ՀՀ վարչապետ Նիկոլ Փաշինյանը։
Արդարադատության նախարար Ռուստամ Բադասյանը, ներկայացնելով արտակարգ դրության ժամկետը երկարաձգելու վերաբերյալ նախագիծը, ներկայացրեց նաև այն փոփոխությունները, որոնք լինելու են:
Մասնավորապես վերացվում է ՀՀ քաղաքացիություն չունեցող անձանց ՀՀ մուտքի արգելքը, միաժամանակ նախատեսվում է, որ ՀՀ մուտք գործելիս, եթե անձի նկատմամբ հոսպիտալացում չի կիրառվում, նա 14 օրով մեկուսանում է: Սակայն այդ ընթացքում նա կարող է թեստ հանձնել, եթե պատասխանը բացասական լինի, մեկուսացում պետք չի լինի:
Վերացվում է ՀՀ ամբողջ տարածքներում հավաքների ու գործադուլների արգելքը: Այն փոխարինվում է թույլտվությամբ, սակայն որոշակի կանոնների պահպանման պայմաններում: Մասնավորապես պարտադիր է դիմակ կրելն ու սոցիալական հեռավորության պահպանումը:
