Ամուլսարում հրմշտոցի ընթացքում ես չեմ տեսել, որ կանայք գետնին են ընկել. Վայոց Ձորի ոստիկանապետ

Ամուլսարում ակցիա իրականացնող քաղաքացիներից 6-ը բերման են ենթարկվել: Այս մասին Ամուլսարում ընթացքող բողոքի ակցիայի ընթացքում լրագրողներին հայտնեց Վայոց Ձորի ոստիկանապետ Գևորգ Ազիզյանը:

Նա, անդրադառնալով լրագրողի դիտարկմանը, թե քաղաքացիներին բերման ենթարկելու ընթացքում բռնի ուժ է կիրառվել, նաև կանայք են գետնին ընկել, ասաց.

«Հրմշտոցի ընթացքում, երբ փորձ է արվել հասարակական կարգը պահպանել, ես չեմ տեսել, որ կանայք գետնին են ընկել, բայց հնարավոր է՝ նման իրավիճակ էլ առաջացած լինի: Համենայն դեպս, դրանում ոչ մի դիտավորություն չկա, ոստիկանական ուժերն  ընդամենը փորձել են կատարել իրենց գործառութային պարտավորությունները՝ օրենքով սահմանված կարգով»:

Ազիզյանը նշեց, որ երբ քաղաքացին չի ենթարկվում պահանջներին, նրա նկատմամբ կիրառվում է հարկադրանքի միջոց: Հարցին՝ արդարացվա՞ծ է հարկադրանքի միջոցը, Ազիզյանն արձագանքեց՝ նման իրավիճակում՝ այո:

Հարցին՝ Ոստիկանությունն ի՞նչ գործողություններ է անելու, Ազիզյանը պատասխանեց, թե հասարակական կարգն է պահելու, փորձելու է հանդարտեցնել իրավիճակը, հսկողություն է իրականացնելու, որ որևէ անօրինական արարք տեղի չունենա, հորդորելու է պահպանել պարետի որոշումները: Դիտարկմանը, թե ճանապարհը շարունակում է փակ մնալ, և հարցին՝ Ոստիկանությունը որևէ գործողություն իրականացնելու է, Ազիզյանը պատասխանեց. «Հաշվի առնելով իրավիճակը այս պահին՝ ընդամենը հետևելու ենք ու հորդորելու ենք քաղաքացիներին ճանապարհը բացել»:

Դիտարկմանը, թե տպավորություն է, որ Ոստիկանությունը մեղավորություն է զգում ակտիվիստ Արթուր Գրիգորյանի ոտքը վնասելու համար, այդ պատճառով չեզոքություն է դրսևորում, Ազիզյանն արձագանքեց, թե ոչ մի մեղավորություն չկա, որովհետև իր գնահատմամբ՝ դա պատահականություն է եղել՝ դժբախտ պատահարի ընթացքում:

Նա նաև նշեց, որ եթե արձանագրվի, թե անհամաչափ ուժ է կիրառվել, կիրառողները կպատժվեն:

Հարցին՝ նա քննարկման հեռանկար տեսնու՞մ է, Ազիզյանն արձագանքեց. «Իհարկե: Ես բազմիցս ներկա եմ գտնվել այս քաղաքացիների ակցիաներին, շփվել ենք:

Բոլորը ողջամիտ, գիտակից մարդիկ են, որոնք ունեն որոշակի պահանջներ: Պահանջներին չեմ կարող գնահատական տալ, որովհետև ծառայության մեջ եմ»:

 

 

Քաղաքականություն

Պատահարներ