Երեքան լողալ չի իմացել. Վերին Դվինում ջրանցքն ընկած երեխայի դին հայտնաբերվել է

Վերին Դվին գյուղում այսօր՝ հուլիսի 27-ին, ջրանցքն ընկած 14-ամյա տղայի դին քիչ առաջ հայտնաբերվել է: Այս մասին NEWS.am-ին հայտնել է  համայնքապետ Լյուդմիլա Պետրովան:

Ավելի վաղ նա մեզ հետ զրույցում դեպքից մանրամասներ էր պատմել. «3 ընկերներով են գնացել ջրանցքում լողալու, ընկերոջ պատմելով ջրանցքն ընկած տղան լողալ չի իմացել, փորձել է սովորել ու պատմում է, որ մտել են ջրի տակ դուրս են եկել ու տեսել են, որ երեխան կարծես խեղդվում է, ու դրանից հետո իջել է ջրի տակ ու էլ չեն տեսել: Վազելով եկել են ջրանցքն ընկած երեխայի տուն, հայրը տանը չի եղել, մայրն ու քույրը զանգել են փրկարար ծառայություն»:

Ավելի վաղ հայտնել էինք, որ հուլիսի 27-ին, ժամը 17։09-ին Ճգնաժամային կառավարման ազգային կենտրոն ահազանգ է ստացվել, որ Վերին Դվին գյուղի տարածքում երեխան ընկել է ջրանցքը․ անհրաժեշտ է փրկարարների օգնությունը։

Դեպքի վայր է մեկնել ԱԻՆ ՓԾ Արարատի մարզային փրկարարական վարչության օպերատիվ խումբը և հրշեջ-փրկարարական ջոկատից մեկ մարտական հաշվարկ։