Կորոնավիրուսի դեմ պայքարող բուժաշխատողների վարձատրությունը 2-3 անգամ բարձրացել է. վարչապետ
Կորոնավիրուսի դեմ պայքարելու եւ բժշկական օգնություն ցուցաբերելու համար Հայաստանում կա բուժաշխատողների պակաս: Առողջապահության նախարարությունը պարբերաբար հայտարարություն է տարածում՝ աշխատանքի հրավիրելով թե՛ բժիշկների ու բուժքույրերի եւ թե՛ կամավորների:
Վարչապետ Նիկոլ Փաշինյանն այսօր ճեպազրույցի ժամանակ անդրադարձավ այս խնդրին՝ պատասխանելով լրագրողի՝ ի՞նչ քայլեր են ձեռնարկվում՝ լրացնելու համար այդ բացը, եւ եթե նոր քայլեր չձեռնարկվեն, ինչպե՞ս է կատարվելու բուժումը հարցերին: «Համակարգը ներկա պահին կարիք ունի ռեանիմատոլոգների եւ անեսթեզիոլոգների: Մնացած մասով աշխատանքներ է տարել հենց նախարարությունը եւ կարողացել է աշխատանքներին ներգրավել նաեւ մեծ թվով կամավորների, բուժաշխատողների, կլինակական օրդինատորների»,- ասաց նա՝ հավելելով, որ աշխատանքներ են տարվում նաեւ հանրապետությունում բժշկական կարողությունները ավելացնելու համար:
