Վրաստանը պատրաստ է օգնել Հայաստանին կորոնավիրուսի դեմ պայքարում. Գամկրելիձե

Եթե ​​Հայաստանի Հիվանդությունների վերահսկման և կանխարգելման ազգային կենտրոնն օգնություն հայցի Վրաստանի գործընկերներից, նրանք կստանան այն, հայտարարել է Վրաստանի Հիվանդությունների վերահսկման և հանրային առողջության ազգային կենտրոնի տնօրեն Ամիրան Գամկրելիձեն ճեպազրույցի ժամանակ: Ինչպես հայտնում է sputnik-georgia-ն, Գամկրելիձեն խոսել է նաև օրեր առաջ տեղի ունեցած թյուրիմածության մասին, նշելով.  «Ինչպես գիտեք, մի շաբաթ առաջ մի փոքր թյուրիմացություն էր տեղի ունեցել: Մենք եղբայր ժողովուրդներ ենք, մենք միշտ սատարում ենք միմյանց, և մենք լավ հարաբերություններ ունենք Հայաստանի հիվանդությունների վերահսկման ազգային կենտրոնի հետ:Ինչ վերաբերում է բուժման գործընթացին, եթե այսօր Հայաստանին պետք է այդ օգնությունը, ես վստահ եմ, որ Վրաստանի կառավարությունն ու Առողջապահության նախարարությունը չեն մերժի և կձեռնարկեն բոլոր ջանքերը: Նախ և առաջ, ՀՀ առողջապահության նախարարությունը պետք է բարձրացնի այդ հարցը, և ես վստահ եմ, որ Վրաստանը կլուծի այն: Ինչպես գիտեք, վրացիները առաջինն էին, որ օգնության էին եկել Սպիտակի երկրաշարժի ժամանակ: Մենք միշտ պատրաստ ենք»: 

Հիշեցնենք, որ ՀՀ առողջապահության նախարար Արսեն Թորոսյանը ավելի վաղ ասել էր, որ Վրաստանի հակահամաճարակային համակարգը էականորեն զիջում է Հայաստանին: Նախարարը նաև նշել էր, որ Հայաստանը թափանցիկ է ներկայացնում իր վիճակագրությունը՝ կասկածի տակ դնելով Վրաստանում վարակակիրների հաշվարկման մեթոդաբանությունը: