«Օրգազմը Ձեզ համար կամ Դուք օրգազմի համար». ինչի մասին է մեծ աղմուկ հանած գիրքը. Lurer. com
Երևանի Արաբկիր վարչական շրջանի Վրացական փողոցում «Օրգազմը Ձեզ համար կամ Դուք օրգազմի համար» վերնագրով երեխաներին գրքեր են բաժանել: Այս մասին տեսաուղերձով հայտնել է 9-ամյա երեխայի հայրը․ «Չի կարելի երեխաներին դեռ մանկուց այսպիսի գրքեր բաժանել և ինչ-որ նման սրբապիղծ դաստիարակություն սերմանել: Ինչ է նշանակում պղծել երեխաներին, ինչ է նշանակում հարամել նրանց մանկական հոգին: Չի՛ կարելի, սրբապիղծներ»,- տեսաուղերձում նշում է օգտատերը: Ահազանգի հետքերով գնալով՝ ԼՈՒՐԵՐ. com-ը փորձել է պարզել՝ ինչպիսին է գրքի բովանդակությունը, և որքանով է տեղին ծնողի ահազանգը։
Հմտորեն փոխկապակցելով գիտությունն ու հումորը՝ գրքի հեղինակը՝ Ջո Կվիրկը, ծանոթագրություններով, երբեմն զվարճալի մեջբերումներով և երբեմն էլ զարմանալի հայտնագործություններով ներկայացնում է մարդու սեռական վարքի ժամանակակից էվոլյուցիոն տեսությունների ոլորտը: Նա թաքնված խաղ է խաղում ընթերցողի հետ ու փնտրում իր նոր ընթերցող «զոհերին»։ Կվիրկը գրում է․ «Ձեր միտքը ֆիզիկապես փոխվում է՝ ենթարկվելով ձեր ցանկությունների թելադրանքին: Մենք տիկնիկներ ենք, և մեր ներսի տիկնիկավարը, թելերով մեղմորեն հպվելով արյունատար անոթներին, «մորթում է» այդ էությունը և նրբորեն թեքում մեր ուղեղի բոլոր փոքրիկ մասերը դեպի կենդանական բնազդները»: Գրքում մեկ այլ նկարագրության մեջ կարդում ենք․ «Տասնյակ ուսումնասիրություններ ապացուցել են, որ դաշտանային անկանոնությունները կանխելու լավագույն միջոցը ձեր տղամարդու հետ քնելն է՝ բազկաթոռում թաղված: Այն ավելի լավ է աշխատում, քան բոլոր սահմանված դեղամիջոցները: Իմունիտետ ունեցող տղամարդու հոտը ազդարարում է կնոջը, որ նա պետք է նախապատրաստվի հղիությանը, քանի որ նրա գեներն ակնարկում են առողջ երեխա լույս աշխարհ բերելու մասին: Այո, իսկապես, սիրո առեղծվածը ձևավորվում է բազկաթոռների մեջ»։
Խնդիրը բարձրաձայնող ծնողը սպառնացել էր սպանել այն անձանց, ովքեր նմանատիպ գրքեր կբաժանեն երեխաներին։
Ի դեպ, Ազգային ժողովի պատգամավոր Իվետա Տոնոյանը հարցում էր ուղարկել ԿԳՄՍ նախարար Արայիկ Հարությունյանին` թեմայի հետ կապված տեղեկատվություն տրամադրելու վերաբերյալ, որին ի պատասխան նախարարությունից հայտնել էին. «ՀՀ ԿԳՄՍՆ-ն որևէ տեղեկություն չունի այն լուրի վերաբերյալ, թե Երևանի փողոցներում երեխաներին բաժանվել են գրքեր։ Բոլոր նրանք, ովքեր որևէ տեղեկություն կամ փաստ ունեն այս խնդրի վերաբերյալ, հորդորում ենք դրանք տրամադրել իրավապահներին»։
