Նոր Նորքի շատրվանի կողքը կառուցվել է ինչ-որ մեկի տունը, շատրվանն էլ մեջ-մեջ է արված. ավագանու անդամ

«Նոր Նորքում կա շատրվան, որի  անմիջապես կողքը կառուցվել է ինչ-որ մեկի տունը: Էլ չեմ ասում, որ շատրվանն էլ մեջ-մեջ է արված մի քանի սեփականատերերի միջեւ, որտեղ տարբեր անհասկանալի գործունեություններ են կազմակերպվում: Կարծես այդ շատրվան իրենց բակի համար է կառուցվել ժամանակին»,- այս մասին, այսօր՝ մայիսի 26-ին Երեւանի ավագանու նիտում իր ելույթում նշեց «Իմ քայլը» խմբակցության անդամ Արման Անտոնյանը՝ անդրադառնալով Երեւանի այգիներում սեփականաշնորհված տարածքների խնդրին:

Անդրադառնալով այդ խնդրին՝ քաղաքապետ Հայկ Մարությանը նշեց. «Այս պահին երկու տնտեսվարող կա, որ քաղաքի այգիներում ունի սեփական տարածքներ, այդ մարդիկ ասում են՝ ասեք, ինչ անենք, ուզում ենք շինարարություն անել: Մենք ասում ենք՝ չէ, չի լինի շինարարություն անել: Ասում են՝ բա ինչ անենք, փոխանակում են առաջարկում, բայց փոխանակման լավ առաջարկ չունենք, որովհետեւ նորմալ հողակտոր էլ չի մնացել:

Եթե մտահոգություն կա եւ կա ցանկություն, եկեք դրամահավաք կազմակերպեք, գնանք խոսենք այդ տնտեսվարողի հետ, գնահատենք հողը, գումարը տանք: Կստացվի, որ ավագանին փրկեց այդ տարածքը»: