Մենք մարտ ամսվա աշխատավարձ դեռ չենք ստացել: Այս մասին Auroranews-ի հետ զրույցում ասացին «Երեւանի միկրոավտոբուսային ՄՈւԱՏ» ՓԲԸ-ի մի շարք աշխատակիցներ: Նշենք, որ ընկերությունը մայրաքաղաքում միկրոավտոբուսներ շահագործող ամենամեծ ընկերություններից է համարվում: Աշխատակիցները մեզ հետ զրույցում նշեցին, որ ծայրահեղ վիճակում են հայտնվել: «Առավոտյան 7:30-ից մինչև գիշերվա 22:00-ն աշխատում ենք և առանց մի դրամի տուն գնում: Երբեմն ստացվում է, որ ընկերությանը պատք ենք մնում և օրական 4000 դրամի «պլանի գումարն» էլ չենք կարողանում վճարել»- Auroranews-ի հետ զրույցում նշեց վարորդներից Պարույր Վարդանյանը: 

Հետաքրքրվեցինք, թե աշխատանքը վերսկսելուց հետո միջին կտրվածքով օրվա ընթացքում որքան գումար են աշխատում: «Միջինում 13000 դրամ, երբեմն ավելի քիչ: Դրանից 9000-ին մեքենայի գազն ենք լցնում, 1000 դրամի ընդմիջում ենք անում՝ չնայած վերջին շրջանում ոչ միշտ, մնացածն էլ արդեն ընկերությանն ենք տալիս: Ստացվում է, որ ես վաղ առավոտից աշխատում եմ, սակայն այսօր իմ բնակարանը հոսանքազրկված է, քանի որ հնարավորություն չեմ ունեցել վճարել էլեկտրաէներգիայի գումարը: Այսքան տարիների ընթացքում առաջին անգամ է, որ նման ձևով խնդիր ենք բարձրաձայնում, բայց մեզ էլ է պետք հասկանալ, քանի որ այսպես ապրելը պարզապես անհնարին է: Որոշ վարորդներ տեսնելով, որ լրատվականի հետ ենք խոսում, ասացին, թե հնարավոր է խնդիրներ ունենամ, բայց ի՞նչ կարող եմ անել», - նշեց վարորդը: 

Հարցին՝ փորձել է այս ընթացքում այլ աշխատանք փնտրել, վարորդը պատասխանեց. «Իհարկե փորձել եմ: Ուր էլ գնում եմ, տեսնում են, որ նորմալ վարորդ եմ, բայց բոլոր տեղերից էլ ասում են, որ վիճակը մինչև սեպտեմբեր ամիս չի կարգավորվի: Ես գումար չեմ խնդրում որևէ մեկից, ինձ պարզպես աշխատանք է պետք, որ կարողանամ ընտանիքս պահել, ոնց արել եմ մյուս տարիներին: 

Վերջերս տեղի ունեցած բողոքի ակցիայից հետո մեզ էլ ներառեցին աջակցության 8-րդ ծրագրի մեջ և 64000 դրամ օգնություն տրամադրեցին, բայց ով չգիտի, որ Հայաստանում ապրող մարդկանց մեծամասնությունը կախված է բանկերից, այդ գումարով վարկ եմ վճարել»,- նշեց Վարդանյանը՝ ևս մեկ անգամ շեշտելով, որ ինքը որևէ մեկից գումար չի խնդրում: Ընդգծենք, որ նման խնդրի առաջ են կանգնել երթուղայինների մեծ թվով վարորդներ, որոնք պարբերաբար դիմում են Auroranews-ի խմբագրություն՝ իրենց հարցը կառավարությանը լսելի դարձնելու նպատակով: