ԵԽ-ն Վրաստանին 150 միլիոն եվրո կհատկացնի կորոնավիրուսի համավարակի դեմ պայքարի համար
Եվրախորհրդարանը հաստատել է Վրաստանին 150 միլիոն եվրո հատկացնելու համար մակրոֆինանսական օգնության փաթեթը` կորոնավիրուսի համավարակի տնտեսական հետևանքները հաղթահարելու համար: Այս մասին նշվում է Եվրախորհրդարանի կայքում տեղադրված մամուլի հաղորդագրության մեջ:
Ապրիլի վերջին Եվրահանձնաժողովը հայտարարել է 3 միլիարդ եվրո գումարի չափով օգնություն տրամադրելու մասին՝ 10 երկրում կորոնավիրուսի դեմ պայքարի համար, այդ թվում ՝ Վրաստանում: Այս գումարի մեծ մասը կստանա Ուկրաինան ՝ 1,2 միլիարդ եվրո, երկրորդ տեղում Թունիսն է (600 միլիոն), երրորդում ՝ Բոսնիա և Հերցեգովինան (250 միլիոն):
Հաղորդվում է, որ մայիսի 5-ին ԵՄ խորհուրդը մշտական ներկայացուցիչների մակարդակով ընդունել է փաթեթը հատկացնելու վերաբերյալ Եվրահանձնաժողովի առաջարկը: Օգնության տրամադրումն արագացնելու համար Եվրախորհրդարանը քվեարկել է դրա շտապ հաստատման օգտին: Որոշումն ընդունվել է 547 կողմ, 93 դեմ և 47 ձեռնպահ ձայնով:
