Ալեն Սիմոնյանը կեղծ պնդումներ է արել Էդմոն Մարուքյանի քվեարկությունների մասին. fip.am

Ազգային ժողովի միջանցքում մայիսի 13-ին վիճաբանություն տեղի ունեցավ ԱԺ փոխխոսնակ Ալեն Սիմոնյանի և «Լուսավոր Հայաստան» խմբակցության ղեկավար Էդմոն Մարուքյանի միջև։

Միջադեպից հետո Ալեն Սիմոնյանը, վերահաստատելով օրեր առաջ իր հնչեցրած միտքը, թե Էդմոն Մարուքյանը համագործակցում է նախորդ իշխանությունների հետ, որպես հիմնավորում, հայտարարեց, թե Մարուքյանը կողմ է քվեարկել նախկին կառավարության բոլոր ծրագրերին։

«Քվեարկությունները, որոնք անմիջականորեն վերաբերում են Միքայել Մինասյանին, քվեարկությունները, որոնք անմիջականորեն վերաբերել են նախորդ իշխանությանը, ասեմ` կառավարության բոլոր ծրագրերին պատգամավոր Էդմոն Մարուքյանը կողմ է քվեարկել», — հայտարարեց Ալեն Սիմոնյանը, գրում է fip.am-ը: 

«Փաստերի ստուգման հարթակը» փորձեց ստուգել Ալեն Սիմոնյանի այս հայտարարությունները, թեև հարկ է նշել, որ հասկանալի չէ, թե ինչ նկատի ունի Սիմոնյանը՝ «քվեարկությունները, որոնք անմիջականորեն վերաբերում են Միքայել Մինասյանին» ասելով, քանի որ դա որևէ կերպ չափելի չէ և մեկնաբանման հարցն է։

Հիշեցնենք, որ օրեր առաջ Ալեն Սիմոնյանը նմանատիպ մեկ այլ հայտարարությամբ պնդել էր, թե Էդմոն Մարուքյանը «քվեարկում է Սերժ Սարգսյանի կառավարությունների բերած բոլոր բյուջեներին, չի քվեարկում մեր բյուջեներին»։ «Փաստերի ստուգման հարթակը», սակայն, պարզել էր, որ Ալեն Սիմոնյանի այդ հայտարարությունը չի համապատասխանում իրականությանը, և Մարուքյանը, այնուամենայնիվ, դեմ է քվեարկել նաև նախորդ իշխանության ներկայացրած բյուջեին։

Վերադառնալով Սիմոնյանի այս վերջին հայտարարությանը՝ նախ նշենք, որ սկսած 2012 թվականից, երբ Էդմոն Մարուքյանն ընտրվել է ԱԺ պատգամավոր, կառավարության կողմից Ազգային ժողով է ներկայացվել կառավարությունների 2 հնգամյա ծրագիր (2012-2017 թթ․ և 2017-2022 թթ․) և 5 ամենամյա ծրագիր։

Տիգրան Սարգսյանի կառավարության 2012-2017 թթ․ հնգամյա ծրագրին, ինչպես նաև 2013 և 2014 թվականների կառավարության ծրագրերին Էդմոն Մարուքյանը կողմ է քվեարկել։ Նախկին իշխանությունների օրոք Մարուքյանը դեմ է քվեարկել կառավարության 2016 թ․ ծրագրին ու 2017-2022 թթ․ հնգամյա ծրագրին։

Հեղափոխությունից հետո՝ 2018 թ․ հունիսի 7-ին, Նիկոլ Փաշինյանի նոր ձևավորված կառավարության ներկայացրած ծրագրին Մարուքյանը կողմ է քվեարկել և միայն վերջին՝ կառավարության 2019 թ․ ծրագրին է, որ «Լուսավոր Հայաստան» խմբակցությունը, Էդմոն Մարուքյանի գլխավորությամբ, դեմ է քվեարկել։

Այսպիսով, կարող ենք փաստել, որ Ալեն Սիմոնյանի այն հայտարարությունը, թե Էդմոն Մարուքյանը նախորդ կառավարությունների ծրագրերին կողմ է քվեարկել, չի համապատասխանում իրականությանը, ավելին՝ Էդմոն Մարուքյանը ոչ միայն դեմ է քվեարկել նախկին կառավարությունների մի քանի ծրագրերի, այլ նաև կողմ՝ այս իշխանությունների օրոք կառավարության ներկայացրած 2018 թ․ ծրագրին։