Մեր խմբակցության պատգամավորները լքում են նիստերի դահլիճը. Էդմոն Մարուքյան
Խորհրդարանն ընդմիջումից հետո շարունակեց աշխատանքը:
«Լուսավոր Հայաստան» խմբակցության ղեկավար Էդմոն Մարուքյանը, ԱԺ ամբիոնին մոտենալով, նշեց, որ նույն ելույթն այլևս չի կարող շարունակել:
Նրա խոսքով՝ տեղի ունեցածը իրենց խնդիրն է, բայց ավելի շատ հեղափոխության առաջնորդինն է:
«Այն միջադեպը, որ տեղի ունեցավ, դրանից անցել է մոտ երեք ժամ և ավել, մենք չտեսանք որևէ արձագանք, որը հարիր է ժողովրդավարական քաղաքական համակարգին: Ես կարծում եմ, որ ոտնահարվել են ժողովրդավարության հիմքերը հեղափոխության հռչակված արժեքները, և կարծում եմ՝ Հայաստանի պատմության մեջ աննախադեպ բան է տեղի ունեցել: Եթե կասեք՝ 1996-ին էլ են պատգամավորի խփել, 2002-ին էլ, ինչքան հիշում եմ՝ խմբակցության ղեկավարի դեռ չեն խփել հետևից, կողքից: Այն, ինչ տեղի է ունեցել, մեծ հաշվով, մեր պրոբլեմն էլ է, բայց ավելի շատ հեղափոխության առաջնորդի պրոբլեմն է: Մենք հիմա կլքենք նիստերի դահլիճը և ապագայում՝ կախված քաղաքական գնահատականից և հետևանքներից, կանենք եզրահանգումներ, կորոշակիացնենք մեր անելիքները և կհասկանանք ապագայում՝ ինչպես ենք աշխատելու այս խորհրդարանում»,- ասաց նա:
