Մահացել է ԱԺ նախկին պատգամավոր Երջանիկ Աբգարյանը

Երկարատև հիվանդությունից հետո 80 տարեկանում մայիսի 7-ին մահացել է ՀՀ Գերագույն խորհրդի և Ազգային ժողովի նախկին պատգամավոր Երջանիկ Աբգարյանը։

«Արմենպրես»-ի հետ զրույցում՝ այս մասին ասել է  Հայ ազգային կոնգրեսի մամուլի խոսնակ Արման Մուսինյանը։

«Երջանիկ Աբգարյանը մահացել է այս գիշեր՝ երկարատև հիվանդությունից։ Մայիսի 8-ին՝ ժամը 18։00-ին տեղի է ունենալու նրա հոգեհանգստի արարողությունը»,- նշեց Մուսինյանը։

Երջանիկ Աբգարյանը ծնվել է 1940 թվականին ՀՀ Կոտայքի մարզի Արգել գյուղում։ 1964-1968 թվականներին սովորել է Երևանի պետական համալսարանի արևելագիտության բաժնում։ 

1990-1995 թվականներին եղել է Գերագույն խորհրդի պատգամավոր, Հայոց համազգային շարժում կուսակցության անդամ, 1992-1997 թվականներին` ՀՀ մաքսային վարչության պետ, 1996-1999 թվականներին` ՀՀ ԱԺ պատգամավոր, Հայոց համազգային շարժում կուսակցության անդամ։