Փաշինյանը՝ Էրիկ Գրիգորյանի պաշտոնից ազատման մասին

ՀՀ վարչապետ Նիկոլ Փաշինյանին այսօր խորհրդարանում հարց ուղղվեց Հայաստանի բնապահպանական վիճակի, ինչպես նաև շրջակա միջավայրի նախարար Էրիկ Գրիգորյանի՝ պաշտոնից ազատման պատճառների մասին:

«Ես նախ ուզում եմ պարոն Գրիգորյանին շնորհակալություն հայտնել այս ընթացքում կատարած աշխատանքի համար, համոզված եմ, որ նա այս ընթացքում արել է առավելագույնը՝ առավելագույն արդյունքների հասնելու համար: Աշխատանքն ինքը բարդ երևույթ է, գալիս են հարցեր, փուլեր, ժամանակներ, երբ անհրաժեշտ է լինում կայացնել որոշումներ, և կայացվել են որոշումներ»,- նշեց վարչապետը: 

Վարչապետն ասաց՝ բնապահպանության ոլորտում էական հաջողություններ ունեցել են նախարարի մասնակցությամբ՝ փոքր ՀԷԿ-երի ջրաչափման խնդիրը գրեթե ամբողջությամբ լուծված է, ստեղծվել են աշխատատեղեր:

«Ես մի քանի անգամ ասել եմ, մեկ-մեկ մտածում եմ՝ նման հայտարարություններ անելով նաև անարդար եմ գտնվում կառավարության անդամների նկատմամբ: Գո՞հ եմ, թե՞ գոհ չեմ: Եթե ինձ հարցնեք՝ իմ աշխատանքից գո՞հ եմ, կասեմ՝ ոչ, գոհ չեմ, սա չի նշանակում, որ ես համարում եմ, որ պարապ եմ, ոչ մի բան չեմ անում, միջոցներ չեմ ձեռնարկում խնդիրներ լուծելու համար, բայց ուզում եմ՝ անենք ավելին, նույնիսկ ավելին, քան հնարավոր է, քան անհնար է, քանի որ 2018-ին արել ենք անհնարը, 2019-ին էլ ենք արել, բայց 2020-ին պետք է ավելի անհնարն անենք, 2021-ին՝ էլ ավելի անհնարը, և այդպես շարունակ»,- ասաց վարչապետը:

Հիժեցնենք, որ Նիկոլ Փաշինյանի մամուլի խոսնակ Մանե Գևորգյանը հայտնել էր, որ Էրիկ Գրիգորյանը շրջակա միջավայրի նախարարի պաշտոնից ազատվել է իր դիմումի համաձայն: