Հույս ունեմ, որ Քարամյանը կհանդարտեցնի հեղափոխության արժեքների դեմ աշխատող որոշ կադրերի. Դանիել Իոաննիսյան
«Իրազեկ քաղաքացիների միավորում» ՀԿ հիմնադիր, ծրագրերի համակարգող, Հանրային խորհրդի անդամ Դանիել Իոաննիսյանը ֆեյսբուքյան իր էջում գրել է.
«Ազնվությամբ ասեմ, որ ուղիղ 2 տարի առաջ այս օրերին գնդապետի ուսադիրներ տալու նման սխեմա առաջարկել էի Արարատ Միրզոյանին և ապա Նիկոլ Փաշինյանին:
Այն ժամանակ հեղափոխություն էր և իրավապահների ղեկավարների ու տեղակալների պաշտոններում պետք էին գնդապետի ուսադիրներով հեղափոխական մարդիկ:
Բայց այն ժամանակ դրա փոխարեն նշանակվեցին Վալերի Օսիպյանն ու Արթուր Վանեցյանը... իսկ այդ մեթոդին դիմեցին հիմա, երբ արդեն վաղուց պետք է իրականացված լինեին այն ինստիտուցիոնել բարեփոխումները, որոնք հնարավորություն կտային առանց օրենքի բացերի օգտագործման իրականացնել մարդավարի հանրային կառավարում ու կադրային քաղաքականություն:
Հ.Գ. Արգիշտի Քարամյանից առաջ նման մի սխեմայով գնդապետի ուսադիրներ ստացել էին ողորմածիկ Գեորգի Կուտոյանը (2016թ.-ին) և Արթուր Օսիկյանը (2009թ.-ին): Վերջիններս, ի տարբերություն Քարամյանի, «միջանկյալ» պաշտոնին (ձևի համար) մի 10-15 օր մնացին:
Հ.Հ.Գ. Այդուհանդերձ, հույս ունեմ, որ Արգիշտի Քարամյանը ԱԱԾ-ում կհանդարտեցնի հեղափոխության (ժողովրդավարական) արժեքների դեմ աշխատող որոշ կադրերի ու կմշակի այդ կառույցի բարեփոխումների փաթեթը»:
