Ազգային-ազգային ասելով ավելի քան 25 տարի ազգին թշվառացրել են. վարչապետ

ՀՀ վարչապետ Նիկոլ Փաշինյանն այսօր ֆեյսբուքյան ուղիղ եթերի ժամանակ անդրադարձել է 2020թ․ ապրիլի 24-ի միջոցառումներին։

Նա նշել է, որ հասարակության արձագանքը ցույց է տալիս, որ չնայած արտակարգ պայմաններին՝ հաջողվել է բարձր մակարդակով կազմակերպել ոգեկոչման արարողությունները:

«Երբ մենք հայտարարում էինք, որ պետք է ներողություն խնդրելով, կսկիծով, ինքներս մեզ դատափետելով փակենք Ծիծեռնակաբերդի հուշահամալիր տանող ճանապարհները, շատ կոնկրետ շրջանակներից եղան շատ կոնկրետ մեկնաբանություններ, ինչպես և կարելի էր սպասել, որ ահա, այս ապազգային, պրոթուրքական իշխանությունը հատուկ փակում է Ծիծեռնակաբերդը, որպեսզի մոռացության մատնի Ցեղասպանության պատմությունը և այլն: Մենք ասում ենք, որ ազգային-ազգային ասելով ավելի քան 25 տարի ազգին թշվառացրել են, ազգին թալանել են և դա արել են ազգային ամենաբարձր կարգախոսների ներքո: Ես չեմ հավատում այն մարդկանց, որոնք ազգային կարգախոսների ներքո, այդ թվում շահարկելով թեկուզ ընդունելի, ազգին մատուցած իրենց մի շարք ծառայություններ, դա համարել են լեգիտիմություն` ազգին նվաստացնելու, ազգին թալանելու, միլիոններ, միլիարդներ վաստակելու, փողեր լվանալու և այո սա մեր ազգայինի ընկալումն է»,- ուղիղ եթերի ժամանակ հայտարարեց վարչապետ Նիկոլ Փաշինյանը: