8-րդ միջոցառմամբ արդեն 78 հազար 783 քաղաքացու տրամադրել ենք աջակցություն. վարչապետի օգնական

9-րդ միջոցառմամբ այս պահին աջակցություն ենք ցուցաբերել շուրջ 70 հազար ընտանիքների, շատ հնարավոր է, որ մինչեւ օրվա ավարտը այդ թիվը կրկնապատկվի։ Այս մասին այսօր ՀՀ կառավարության մամուլի կենտրոնում՝ ասուլիսի ժամանակ հայտարարեց վարչապետի օգնական Նաիրի Սարգսյանը։

Միջոցառումը վերաբերվում է անչափահաս երեխաներ ունեցող և միաժամանակ աշխատանք չունեցող ընտանիքներին։ Յուրաքանչյուր անչափահաս երեխայի համար ընտանիքին տրամադրվում է 26 հազար 500 դրամ աջակցություն։

Անդրադառնալով 8-րդ միջոցառմանը՝ Սարգսյանն հայտնեց. «8-րդ միջոցառմամբ այս պահի դրությամբ մենք 78 հազար 783 քաղաքացու տրամադրել ենք աջակցություն՝ 5 մլրդ 456 մլն դրամի չափով։ Այսօր առավոտվանից արդեն մենք ծրագրում ավելացրել ենք նոր տուժած ոլորտների ցանկերը, որոնք նախորդ շաբաթ կառավարության նիստում ընդունվեց։ Շուրջ 8 հազար տնտեսվարող սուբյեկտների ցանկ է ավելացվել»: