Մենք հնարավորություն ենք տալիս, դուք էլ, որ նոստալգիայի մեջ եք, գնացեք, վերստեղծեք․ վարչապետ
Ես բազմիցս լսել եմ ջղայնացած խոսակցություն՝ «ինչպես գյոզալ կոլխոզները քանդեցին»: Մենք ասում ենք՝ Ստալինը զենքի ուժով է դրանք ստեղծել, մենք հնարավորություն ենք տալիս, դուք էլ, որ նոստալգիայի մեջ եք, գնացեք, վերստեղծեք։ Այս մասին ԱԺ- Կառավարություն հարցուպատասխանի ժամանակ ասաց ՀՀ վարչապետ Նիկոլ Փաշինյանը:
Խոսելով ոռոգման ջրի բարձր արժեքի մասին՝ վարչապետը շեշտեց, որ ոռոգման ջուրը վաճառում ենք 1 խմ-ը՝ 11 դրամով, բայց այդ ջրի արժեքը կրկնակի, եռակի, քառակի ավել է, գյուղացին պոմիդոր է ցանում ոչ նորմատիվային հողերի վրա, ջրում է հինգ անգամ առանց ջրաչափման, և ստացվում է, որ պոմիդորի աճեցումը սուբսիդավորվում է:
«Կոպիտ ասած՝ 1 մլն դրամի ջուր ենք ծախսում, որ 200 հազարի պոմիդոր ստանա գյուղացին: Հարց՝ կարո՞ղ է ավելի ճիշտ է այդ գումարը տալ: Փոխարենը ուրիշ տեղեր մարդիկ ասում են՝ մեզ տվեք խորանարդ մետրը 100 դրամով, բայց սահմանափակումներ մի դրեք, տվեք՝ ինչքան ուզում ենք: Ես առաջարկում եմ գյուղատնտեսության ոլորտի լացուկոծի քաղաքականությունը փոխակերպել իրավիճակը հասկանալու, ռազմավարական քայլերով առաջ գնալու քաղաքականության»,- ասաց Փաշինյանը:
