Auroranews- ը ահազանգ է ստացել Երևանի Նոր Արեշի 2-րդ փողոցի բնակիչներից։ Քաղաքացիները դժգոհում են բնակելի տարածքին հարակից Զանգու գետի աղտոտվածությունից։ 

«Գետին շատ մոտ գտնվող տներ կան, այստեղ է տեղակայված նաև Երևանի թիվ 71 մանկապարտեզը։ Չգիտենք ինչ անենք, խնդրով նաև քաղաքապետարանին են դիմել, շուրջբոլորը միայն աղտոտվածություն և գարշահոտություն է: Բնակելի թաղամասին մոտ գտնվող գետը աղբի մեջ կորած է»,- ասաց մեզ դիմած քաղաքացիներից մեկը

Auroranews-ը այս հարցով մեկնաբանություն փորձեց ստանալ նաև Երևանի քաղաքապետարանի  տեղեկատվության և հասարակայնության հետ կապերի վարչության պետ Հովսեփ Կուբատյանից: 

«Խնդիրը «Ջրառ» ՓԲԸ- ի տիրույթում է։ Բայց ամեն դեպքում թաղապետարանի աշխատակիցները պարբերաբար բացատրական աշխատանքներ են տանում տեղի բնակիչների հետ, հորդորելով աղբը չթափել գետը։ Իհարկե հասկանում ենք, որ այստեղ խնդիր կա, բայց բնակիչներն էլ պետք է գիտակցեն, որ աղբը գեներացնողն իրենք են»,- մեզ հետ զրույցում ասաց Հովսեփ Կուբատյանը։