Չնայած կորոնավիրուսի բռնկման պատճառով իտալական Լոմբարդիա նահանգն ու վարչական կենտրոն Միլանը  հայտնվել են կարանտինային  գոտում,  Երևան- Միլան չվերթը չի չեղարկվել։ Այս մասին գրում է  «Ա1+»-ը: 

Ինչպես տեղեկանում ենք «Զվարթնոց» օդանավակայանի կայքից, վաղը՝ մարտի 10-ին նախատեսված է Երևան –Միլան չվերթը, որն իրականացնում է  Ryanair   լոուքոսթ ավիաընկերությունը։   

Ինչո՞ւ չի չեղարկվում այս  չվերթը, երբ  հայտնի է՝ Միլանում եւ Իտալիայի հյուսիսային այլ բնակավայրերում մարտի 8-ից մինչև ապրիլի 3-ը գործում է մուտքի և ելքի հատուկ ռեժիմ։ Իտալիայում  վարակվածների թիվը  հասել է  7375-ի։

Քաղաքացիական ավիացիայի կոմիտեից լրատվամիջոցին փոխանցեցին, որ չվերթի չեղարկման որոշումը ավիաընկերությանն է։   Նման   որոշում Ryanair  ընկերությունը  դեռ չունի։

ԱԳՆ խոսնակ Աննա Նաղդալյանը հայտնել էր, որ   Երեւանից Միլան թռչողները պարտավոր են հետեւել  իտալական իշխանության սահմանափակումներին՝  կարանտինով պայմանավորված։ 

Այսինքն՝  եթե  ուղեւորը, այնուամենայնիվ,  որոշում է  մեկնել Իտալիա, պետք է պատրաստ լինի ենթարկվել   սահմանափակումներին։ Արդեն իսկ փակ են ուսումնական հաստատությունները, մարզասրահները,  թանգարանները։  Բազմաթիվ մշակութային եւ մարզական միջոցառումներ հետաձգվել են։

Հիշեցնենք  նաեւ, որ Ryanair-ի տոմսերը  վերադարձման  ենթակա չեն , եւ եթե  չվերթը չի չեղարկվել՝ ուղեւորը  գումարի վերադարձ չի կարող ակնկալել՝ թռիչքից հրաժարվելու դեպքում։