ՏԵՍԱՆՅՈՒԹ․ Հունաստանում տրակտորներով կպայքարեն Թուրքիայից փախստականների ներհոսքի դեմ
Հունաստանն առաջին անգամ Թուրքիային պաշտոնապես մեղադրել է Հունաստանի տարածքով Եվրոպա հասնել ջանացող փախստականների ապօրինի տեղաշարժերը խթանելու մեջ, հայտնում է ermenihaber-ը։
Նման հայտարարությամբ է հանդես եկել Հունաստանի վարչապետ Կիրիակոս Միցոտակիսն արտաքին գործերի և պաշտպանության խորհրդի նիստից հետո։ Պաշտոնական Աթենքը նաև տեղեկացրել է, որ փախստականների նոր ալիքի պատճառով մեկ ամսով դադարեցվում է ապաստանի դիմումների ընդունումը։
Հայտնի է դարձել, որ մարտի 3-ին Կիրիակոս Միցոտակիսը Եվրախորհրդի նախագահ Չառլզ Միշելի հետ կայցելի Հունաստան–Թուրքիա սահման՝ տեղում ծանոթանալու իրավիճակին։ Այս մասին երկու պաշտոնյաները Twitter-ում առանձին–առանձին հայտարարություններ են արել։
Միցոտակիսը նաև նշել է, որ Հունաստանի սահմանը ապօրինաբար խախտել ջանացող փախստականները պետք է հետ վերադառնան։
Նշենք, որ Հունաստանի ֆերմերները սկսել են իրենց տրակտորներով ու գյուղատնտեսական այլ տեխնիկայով օգնել բանակին ու ոստիկանությանը՝ փախստականների հոսքն արգելափակելու գործում։
