Նոր տեսակի կորոնավիրուսի պանդեմիայի մասին հայտարարելը դեռ վաղ է,130 երկիր դեռ չեն հաղորդել հիվանդության ոչ մի դեպքի մասին: Այս մասին հայտարարել է Առողջապահության համաշխարհային կազմակերպության գլխավոր տնօրեն Թեդրոս Ադհան Գեբրիեսոսը Ժնևում կայացած ճեպազրույցի ժամանակ: 

«Մենք բարձր ենք գնահատում այն, որ մարդիկ այժմ քննարկում են, թե իրավիճակը համաճարա՞կ է, թե՞ ոչ: Մենք ամեն օր հետևում ենք իրավիճակին և վերլուծում ենք տվյալները: ԱՀԿ-ն չի կարողանա հայտարարել COVID-19-ի համաճարակի մասին, մինչև բոլոր ապացույցները այդ մասին չվկայեն», - ասել է Գեբրիեսոսը:  ԱՀԿ-ի գլխավոր տնօրենն ընդգծել է, որ աշխարհում վիրուսի 89.913 դեպքից 90%-ը գրանցված է Չինաստանում, մեծամասնությունը միայն մեկ նահանգում: «Մենք գիտենք, որ մարդիկ վախենում են, բայց ավելի քան130 երկիր դեռևս չի գրանցել COVID-19-ի ոչ մի դեպք»,-ավելացրել է նա: 

Հիշեցնենք, որ Չինաստանի իշխանությունները 2019 թվականի դեկտեմբերի 31-ին ԱՀԿ-ին հայտնեցին Հուբեյ նահանգում անհայտ վիրուսի տարածման մասին: Ավելի ուշ մասնագետները պարզել են, որ այն նոր տեսակի կորոնավիրուս է: