Արցախի ժողովուրդը չպետք է քվերակի ՀՀ իշխանության նկատմամբ թշնամական քարոզչություն իրականացնող թեկնածուի օգտին. Փաշինյան

Արցախում միշտ էլ ընտրոությունների արդյունքներն ավելի վստահելի են եղել քան Հայաստանում: Այս մասին Հանրային հեռուստաընկերության եթերում հայտարարեց վարչապետ Նիկոլ Փաշինյանը, խոսելով Արցախում սպասվող նախագահական ընտրությունների մասին: 

«Ասել, որ Արցախում ընտրությունները վտանգավոր կարող են լինել, դա անհեթեթություն է: Արցախում ժողովրդավարական ընտրությունների անցկացումը ևս մեկ ապացույց է, որ Արցախը կայացած պետություն է ու խոսել այն մասին, որ Արցախը Ադրբեջանի կազմում կարող է լինել, աբսուրդ է: Հայաստանի Հանրապետությունը, մենք մեզ համարում ենք Արցախի անվտանգության երաշխավորը և Արցախի ժողովրդի ազատ կամարտահայտության երաշխավորը:  Մենք համոզված ենք, որ Արցախի ժողովուրդը ամենաբարձր մակարդակով կկառավարի իր իշխանության իրավունքը»,- նշեց վարչապետը: 

Հարցինՙ ՀՀ իշխանություններն ունեն համակրանքներին ու հակակրանքներին, Փաշինյանը պատասխանեց. «Ես հստակ եմ ասել. Արցախի ժողովուրդը չպետք է քվերակի որևէ թեկնածուի օգտին, որը Հայաստանի ժողովրդի կողմից ընտրված լեգիտիմ իշխանության նկատմամբ վարում է թշնամական քարոզչություն ու կրկին հրահրում ներազգային թշնամություն: Այդպիսի ձևով խոսել ու այդպիսի վերաբերմունք ցուցաբերել ժողովրդի ընտրած լեգիտիմ իշխանությանը նշանակում է այդպիսի վերաբերմունք ցուցաբերել այդ իշխանությանը ընտրած ու վստահող ժողովրդին»,- շեշտեց Փաշինյանը: