Ես իմ պարտականությունները կատարելու եմ մինչեւ վերջին պահը. կատարելու եմ բարձր պատասխանատվությամբ: Այս մասին քիչ առաջ լրագրողների հետ զրույցում նշեց ոստիկանապետի պաշտոնակատար Արման Սարգսյանը:

Հարցին, թե արդյոք վարչապետն իրեն առաջարկ արել է, որ ոստիկանապետ նշանակվի, Սարգսյանը պատասխանեց. «Եթե դեռ չի որոշվել՝ ես մնալու եմ, թե ոչ, ինչու պետք է առաջարկ լինի»:

Պատասխանելով հարցին, թե ցանկություն ունի՞ նշանակվել ոստիկանապետը, Սարգսյանը նշեց․ «Ես ցանկություն ունեմ ծառայել Հայաստանին, որտեղ էլ որ լինի»:

Ոստիկանապետի պաշտոնակատարը խոսեց նաև «Ադեկվատ» խմբի անդամներին բերման ենթարկելու հիմնավորումների մասին:Նրա խոսքով՝ Հայաստանում որևէ մեկի նկատմամբ քաղաքական հետապնդում չի իրականացվում: «Ոստիկանությունը լիազորություն ունի ստացված տեղեկությունները ստուգելու համար բերման ենթարկել մարդկանց։ Տեղեկությունները ստուգվում են և սահմանված ժամկետում բերման ենթարկվածները բաց են թողնվում»,-եզրափակեց նա։