Մարտունիում դանակահարել են 16 և 17 տարեկան պատանիների
Դեկտեմբերի 29-ին, ժամը 01.45-ին, ոստիկանության Մարտունու բաժնում հիվանդանոցից հաղորդում է ստացվել, որ «կրծքավանդակի առաջային մակերեսի և աջ բազկի շրջանի կտրած, ծակած վերքեր» ախտորոշմամբ իրենց մոտ բուժօգնության է տեղափոխվել՝ 16-ամյա, և «Գլխի, քունքային շրջանի, կրծքավանդակի ձախ կեսի առաջային պատի կտրած, ծակած վերքեր» ախտորոշմամբ՝ 17-ամյա պատանիներ։ Նրանք հիվանդանոցում հայտնել են, որ անհայտ անձինք իրենց ծեծի են ենթարկել։
Ձեռնարկված օպերատիվ-հետախուզական միջոցառումների շնորհիվ պարզվել է, որ վերջիններիս վնասվածքները պատճառել են 19-ից 20 տարեկան երեք երիտասարդ։
Բացատրական աշխատանքների շնորհիվ, նույն օրը, ժամը 13.45-ին, երիտասարդները ներկայացել են բաժին և տվել խոստովանական բացատրություն:
Հանցագործության գործիք դանակը վերցվել է: Քննությունը շարունակվում է։
