«Ես վախում եմ ոստիկաններից»․ քաղաքացին փորձում էր ինքնահրկիզվել կառավարության շենքի դիմաց
ՀՀ կառավարության շենքի դիմաց միջին տարիքի տղամարդը փորձում է ինքնահրկիզվել, հայտնում են ԱԻՆ լրատվական ծառայությունից։
Նոյեմբերի 29-ին, ժամը 14:16-ին «911» ծառայություն տեղեկություն է հաղորդվել, որ ՀՀ կառավարության շենքի դիմաց քաղաքացին փորձում է ինքնահրկիզվել:
Դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ և հոգեբանական աջակցության բաժնի հոգեբանական խորհրդատվության գծով հրահանգիչը:
Ինչպես հայտնում է aysor.am-ը, քաղաքացին որպես ինքնահրկիզման պատճառ է նշել բիզնեսի կորուստը․ «Բիզնեսով եմ զբաղվել, հարկեր-տուրքեր եմ մուծել, վերջում էլ բանկերը խաբել են, քցել են ինձի, նախկին ոստիկանության աշխատողները՝ դատախազներով բռնցրած։ Մի հատ հրեշ կա՝ Հրաչ Գրիգորյան, որն անձեռնխմելի է, չեն կարացել էդ մարդու վրա», - ասաց քաղաքացին։ «Հլը մի րոպե, ես վախում եմ ոստիկաններից», - գոռում էր քաղաքացին, երբ նրան ոստիկանական մեքենայով հեռացրեցին։
