Փախուստի դիմած դատապարտյալին հսկել են ՔԿՀ երեք ծառայող. նրանք հարցաքննվել են

Այսօր լուսադեմին «Էրեբունի» ԲԿ-ից դատապարտյալ Արայիկ Սարգսյանի փախուստի դեպքի առթիվ քրեական գործ է հարուցվել:

Այս մասին ՀԺ-ի հարցին ի պատասխան ասաց ՀՀ քննչական կոմիտեի դեպարտամենտի տեղեկատվության եւ հասարակայնության հետ կապերի բաժնի պետ Նաիրա Հարությունյանը: Քրեական գործը հարուցվել է ՀՀ քրեական օրենսգրքի 355-րդ հոդվածով (Ձերբակալված, կալանավորված, ազատազրկման հետ կապված պատժի դատապարտված կամ արգելանքի վերցված անձի փախուստը) եւ ՀՀ ՔՕ 315 հոդվածով (Պաշտոնեական անփութությունը):

Մեր տեղեկություններով, դատապարտյալին հիվանդանոցում հսկելիս է եղել ՔԿՀ երեք ծառայող, որոնք արդեն իսկ քրեական գործի շրջանակում հարցաքննվել են: Թե ինչպես է հնարավոր եղել, որ դատապարտյալի փախուստը դուրս է մնացել հսկիչների ուշադրությունից, դեռ հայտնի չէ:

Հիշեցնենք, որ դեպքը տեղի է ունեցել ժամը  05։00-ի սահմաններում. 1988 թվականին ծնված Արայիկ Սարգսյանը «Էրեբունի» բժշկական կենտրոնում բուժման մեջ է գտնվել. նա փախուստի է դիմել հիվանդասենյակից։

«Նուբարաշեն» ՔԿՀ-ի դատապարտյալը (նախկինում դատապարտված 7 անգամ) դատապարտվել էր ազատազրկման 6 տարի 6 ամիս ժամկետով՝ ՀՀ քրեական օրենսգրքի 177 հոդվածի 3-րդ մասով (գողություն)։

ՔԿԾ լրատվական ծառայությունը ներկայացրել է Սարգսյանի արտաքին նկարագիրը՝ հասակը մոտ 170սմ, ատլետիկ կազմվածքով, շագանակագույն աչքերով, լայն ճակատով, սև մազերով, հաստ շուրթերով, փռված, թեք քթով, պարանոցի ձախ հատվածում առկա է վնասվածք վիրակապով, հագին եղել է սև բլուզ, սև սպորտային հագուստ և հողաթափեր:

Վերջինիս տեսնողներին կամ նրա գտնվելու վայրի մասին տեղեկություններ ունեցողներին ՔԿԾ-ն խնդրում է զանգահարել 1-02, 010-44-29-04 հեռախոսահամարներով կամ դիմել ոստիկանության մոտակա բաժին։

Տեղեկություն տրամադրող անձի գաղտնիությունը երաշխավորվում է։