ՄԻՊ-ը ուսումնասիրում է «Արմավիր» ՔԿՀ-ում ենթադրաբար ինքնասպան եղած երիտասարդի դեպքը
Մարդու իրավունքների պաշտպանի հայտարարություն է տարածել «Արմավիր» ՔԿՀ-ում ենթադրաբար ինքնասպանություն գործած երիտասարդի դեպքի վերաբերյալ, որում նշված է.
«Սկսել եմ սեփական նախաձեռնությամբ քննարկում, իմ հանձնարարությամբ՝ իրականացվել է այց «Արմավիր» ՔԿՀ։։
Այս պահին հարկ եմ համարում նշել, որ առնվազն 2017 և 2018 թվականների մահվան, ներառյալ՝ ինքնասպանության դեպքերի կայուն ցուցանիշը վկայում է, որ դրանց պատճառների ու նպաստող պայմանների վեր հանմանն ու կանխարգելման ուղղությամբ համակարգային առումով բավարար աշխատանքներ առհասարակ չեն տարվում:
Ամեն ինչ ավարտվում է դեպքից դեպք քննություն տանելով ու վերջ։
Իրականում, անհրաժեշտ են համալիր միջոցառումներ։ Օրինակ՝ պետք է իրականացվի քրեակատարողական հիմնարկ ընդունված ազատությունից զրկված ինքնասպանության ռիսկայնության պատշաճ գնահատում, ինքնավնասման կամ ինքնասպանության ռիսկի խմբին դասվող ազատությունից զրկված անձանց հասանելի չլինեն կյանքից զրկելու միջոցները, իսկ ինքնասպանության և ինքնավնասման կանխարգելման վերաբերյալ քրեակատարողական ծառայողներն անցնեն պարբերական վերապատրաստումներ և այլն:
Այս ամենի մասին կոնկրետ առաջարկներով խոսվում է իմ զեկույցներում։
Այս դեպքով կձեռնարկվեն անհրաժեշտ բոլոր միջոցները Մարդու իրավունքների պաշտպանի իրավասության շրջանակում»։
