Բալետմայստեր Արմեն Գրիգորյանը դատի է տվել Օպերային թատրոնին

Բալետմայստեր, Երեւանի Ա. Սպենդիարյանի անվան օպերայի եւ բալետի ազգային ակադեմիական թատրոնի բալետային խմբի նախկին ղեկավար-գլխավոր փորձավար Արմեն Գրիգորյանը դատի է տվել Օպերային թատրոնին:

 Գրիգորյանը պահանջում է անվավեր ճանաչել թատրոնի տնօրենի՝ իրեն աշխատանքից ազատելու եւ բալետային խմբի ղեկավար-գլխավոր փորձավարի հաստիքը կրճատելու սեպտեմբերի 13-ի հրամանը:

Թատրոնի բալետային խմբի ղեկավար-գլխավոր փորձավարի հաստիքը կրճատվել է տնօրենի ԺՊ Կարինե Կիրակոսյանի հրամանով՝ Օպերային թատրոնի բալետի արտիստների բողոքներից եւ խռովություններից հետո:

Կիրակոսյանի հրամանի մեջ, մասնավորապես, նշված էր՝ «Հաշվի առնելով, որ բալետային խմբի, գլխավոր բալետմայստերի, բալետային խմբի տեսուչների, փորձավարների գործառույթները կրկնվում են, ինչի արդյունքում խանգարվում է բալետային խմբի աշխատանքի արդյունավետ կազմակերպումը, հանգեցնում կոնֆլիկտային տարբեր իրավիճակների, որոնք բացասաբար են անդրադառնում նաեւ բալետային խմբի առողջ մթնոլորտի, ներկայացումների որակի, ինչպես նաեւ ընդհանուր աշխատանքի արդյունքի վրա, կրճատել թատրոնի խմբի ղեկավար-գլխավոր փորձավարի հաստիքը»:  

Արմեն Գրիգորյանը դատական հայցով պահանջում է նաեւ հարկադիր պարապուրդի այս ամբողջ ժամանակահատվածի գումարը: