ՔԿ-ն վարույթ է ընդունել Նազիկ Ամիրյանին առնչվող քրգործը
ՀՀ ԱԺ նախկին պատգամավոր, գեներալ Մանվել Գրիգորյանի կնոջ՝ Նազիկ Ամիրյանին մասամբ պատկանող «Հայապակի» ընկերությունում հայտնաբերված առերեւույթ չարաշահումների վերաբերյալ քրեական գործը Քննչական կոմիտեն ընդունել է վարույթ:
Այս մասին Armtimes.com-ի հարցին ի պատասխան՝ տեղեկացրին Քննչական կոմիտեի տեղեկատվության եւ հասարակայնության հետ կապերի բաժնից:
Օրեր առաջ Ոստիկանությունը հաղորդագրություն էր տարածել՝ Բյուրեղավանում գտնվող «Հայապակի» ընկերության գույքը առերեւույթ հանցավոր սխեմաներով օտարելու, խարդախությամբ հափշտակելու վերաբերյալ:
Քննչական կոմիտեից մեզ տեղեկացրին, որ դեպքի առթիվ հարուցվել է քրեական գործ՝ ՀՀ Քրեական օրենսգրքի չորս հոդվածներով:
Մասնավորապես, գործը հարուցվել է ՀՀ ՔՕ 325-րդ հոդվածի 1-ին մասով (Փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը), ՔՕ 192-րդ հոդվածի 1-ին մասով (Անօրինական գործողությունները սնանկության ընթացքում), 178-րդ հոդվածի 3-րդ մասի 1-ին կետով (առանձնապես խոշոր չափերով հափշտակությունը), 38-178-րդ հոդվածի 3-րդ մասի 1-ին կետով (առանձնապես խոշոր չափերով հափշտակությանը դրդելը, օժանդակելը կամ կազմակերպելը):
