Ռազմական դրության պայմաններում առողջապահական կառավարումը կվերապահվի նախարարությանը
«Ռազմական դրության իրավական ռեժիմի մասին ՀՀ օրենքում լրացումներ կատարելու մասին» օրենքի նախագիծն ԱԺ-ում քննարկվող վերջին հարցն է, որը ներկայացրեց առողջապահության նախարարի տեղակալ Լևոն Հակոբյանը:
Նա նշեց, որ օրենքի ընդունումը բխում է ռազմական դրության պայմաններում առողջապահության բնագավառի միասնական կառավարման համակարգի ստեղծման և առաջացող խնդիրների արդյունավետ լուծման անհրաժեշտությունից: Նա ներկայացրեց, որ 90-ականներից սկսած՝ բժշկական օգնություն իրականացնող բուժհաստատությունների մասնավորեցման գործընթացի արդյունքում տեղի է ունեցել առողջապահության համակարգի մասնավորեցում, իսկ անկախության տարիներին առողջության առաջնային պահպանման համակարգի ապակենտրոնացման արդյունքում լիազորությունները պատվիրակվել են ՏԻՄ-երին: Արդյունքում հետևյալ իրավիճակն է.;
Ներկայում ՀՀ-ում գործում են 125 հիվանդանոցային կազմակերպություններ, 51-ը՝ Երևանում, 74-ը՝ մարզերում, 68-ը մարզային ենթակայության են, 36-ը՝ մասնավոր, 7-ը՝ այլ գերատեսչությունների ենթակայության:
Գործում են առողջության առաջնային ծառայություն մատուցող 360 հաստատաություններ, 86-ը՝ պոլիկլինիկաներ, գյուղական առողջության պահպանման 268 հաստատություններ:
Մասնավոր հիվանդանոցային բուժօգնություն սպասարկող հիմնարկներում է տեղավորված հանրապետության մահճակալային ֆոնդի 32 տոկոսը, մեծամասնությունը խոշոր բազմաֆունկցիոնալ հիվանդանոցներ են, որտեղ կենտրոնացված է առողջապահական համակարգի մարդկային ներուժի զգալի մասը:
«Ուստի, նրանց գործունեությունը դեր կունենա ռազմական դրության պայմաններում: Հիվանդանոցային բուժօգնություն և սպասարկում իրականացնող միայն 17 կազմակերպություն և առողջության առաջնային պահպանման ծառայություն մատուցող մեկ հաստատություն է գտնվում Առողջապահության նախարարության ներքո, ինչը խաղաղ պայմաններում արդարացված է, սակայն ՀՀ-ի վրա զինված հարձակման կամ պատերազմ հայտարարելու դեպքում՝ ռազմական դրության պայմաններում, կծագի առողջության պահպանման համակարգի միասնական կառավարման անհրաժեշտություն»,-ասաց առողջապահության փոխնախարարը:
Նշեց նաև, որ կառավարության որոշման համաձայն՝ սահմանված է զորահավաքային առաջադրանք ունեցող դեղարտադրող կազմակերպությունների ցանկ, սակայն հանձնարարությունը մինչ օրս սահմանված չի եղել որևէ օրենսդրական ակտով, նախագծով լրացվելու է նաև այս բացը, հետևաբար.
«Առաջարկվում է ռազմական դրության պայմաններում միասնական առողջապահական համակարգի ստեղծում, առողջապահական նախագծի ընդունմամբ բուժօգնություն և սպասարկում իրականացնող կազմակերպությունների՝ անկախ սեփականության ձևից, կառավարման լիազորությունների վերապահում ՀՀ առողջապահական բնագավառի պետական կառավարման լիազոր մարմնին»,-ասաց Լևոն Հակոբյանը:
