Ամենայն հայոց կաթողիկոս`Գարեգին Բ-ն, կմեկնի Շվեյցարիա

Հոկտեմբերի 11-ին Ն.Ս.Օ.Տ.Տ. Գարեգին Բ Ծայրագույն պատրիարք և Ամենայն Հայոց կաթողիկոսը երկօրյա հայրապետական այցով կմեկնի Ժնև (Շվեյցարիա):

Շվեյցարիայի Կարմիր խաչի նախագահ Թոմաս Հայնիգերի և Ժնևյան Կարմիր խաչի նախագահ Մատտեո Պեդրացինիի հրավերով Ամենայն Հայոց կաթողիկոսը կմասնակցի Շվեյցարիայի Կարմիր խաչի 2019 թ. հանդեսին, որն այս տարի անցկացվելու է «Պայծառացրեք մեր տարեցների կյանքը» նշանաբանի ներքո և հավաքագրված միջոցները նպատակաուղղելու է նաև Հայաստանում կարիքավոր տարեցների և հաշմանդամություն ունեցող անձանց խնամքին և զորակցությանը:

Նորին Սրբությունը կհանդիսապետի նաև Ժնևի Ս. Հակոբ հայկական եկեղեցու կառուցման 50-ամյակի արարողությունները:

Այցի ընթացքում Վեհափառ Հայրապետին ուղեկցելու են Արևմտյան Եվրոպայի Հայրապետական պատվիրակ և Վատիկանում Ամենայն Հայոց կաթողիկոսի ներկայացուցիչ Գերաշնորհ Տ. Խաժակ արքեպիսկոպոս Պարսամյանը, Մայր Աթոռի Միջեկեղեցական հարաբերությունների բաժնի պատասխանատու Հոգեշնորհ Տ. Շահե ծայրագույն վարդապետ Անանյանը և Տեղեկատվական համակարգի տնօրեն Արժանապատիվ Տ. Վահրամ քահանա Մելիքյանը: