Քաղաքապետարանը 9.000 աղբաման է պատվիրել, հիմա աշխատում է 34 աղբատար մեքենա
Երեւանի քաղաքապետարանը 9.000 աղբաման է պատվիրել եւ շուտով բոլորը կստացվեն: Լրագրողների հետ ճեպազրույցում ասաց Երեւանի քաղաքապետ Հայկ Մարությանը:
«Այսօր արդեն տեսնում ենք դրական փոփոխություններ, բայց սա վերջը չէ, ավելի լավ է լինելու: Սանմաքրումը մենք նոր ենք սկսում, որովհետեւ մինչեւ այս միայն աղբահանություն էինք իրականացնում: Այս պահին փոխված է 4.000 աղբաման, նախատեսում ենք փոխել եւս 9.000-ը»,- նկատեց քաղաքապետը:
Նա նշեց, որ այս պահին աշխատում է 34 աղբատար մեքենա, նախատեսում են, որ պետք է աշխատի 54-ը: Քաղաքապետը շնորհակալություն հայտնեց քաղաքացիներից այդքան համբերատար գտնվելու համար: Նկատեց, որ այս պահին աղբահանությունը դրական է գնահատում, բայց շատ ավելի լավ է պատկերացնում այն, ինչն այս պահին չկա:
«Սանմաքրման աշխատանքների համար սկսել ենք մարդկանց հավաքագրումը: Այդտեղ նույնպես դրական դինամիկա է լինելու»,- վստահեցրեց Հայկ Մարությանը:
