Քոչարյանի պաշտպանները ինքնաբացարկի միջնորդություն են ներկայացրել դատավորին
ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանն այսօրվա դատական նիստի ժամանակ հայտարարեց, որ պատրաստվում է դատավոր Աննա Դանիբեկյանին ինքնաբացարկի միջնորդություն ներկայացնել:
«Սակայն ես տեղեկացա, որ իմ կոլեգան պատրաստվում է Արմեն Գևորգյանի խափանման միջոցի վերաբերյալ միջնորդություն անել: Ես դեմ չեմ, եթե դատարանը այդ միջնորդությանն առաջնահերթություն տա, հատկապես հաշվի առնելով, որ դատական քննություն նշանակելու Ձեր որոշման մեջ նշել էիք, որ խափանման միջոցի հարցը քննարկվելու է առաջնահերթության կարգով»,- ասաց նա:
Ալումյանը հետաքրքրվեց՝ եթե դատարանը կգտնի, որ կոլեգայի միջնորդությունը ներկայացնելուց հետո ինքն իր միջնորդությունը ներկայացնելու իրավունքը կկորցնի, ապա հիմա ներկայացնի, հակառակ դեպքում կարծում է, որ խափանման միջոցի հարցը ավելի առաջնային է, քանի որ վերաբերում է խափանման միջոցին:
«Հաշվի առնելով, որ Դուք արդեն իսկ պատրաստել եք ինքնաբացարկի միջնորդություն, դատարանը հնարավոր չի գտնում մինչ այդ միջնորդության լուծումը այլ միջնորդություն քննարկել»,- ասաց դատավորը։
Ալումյանը նշեց՝ կան մի շարք հանգամանքներ, որոնք բացառում են նրա մասնակցությունը այս քրեական գործին: Պաշտպանը դատավորի ինքնաբացարկի երկու հիմք ներկայացրեց, առաջինը՝ նա պատշաճ դատարան չի կարող համարվել, երկրորդը կանխակալ բացասական վերաբերմունք ունի Ռոբերտ Քոչարյանի նկատմամբ:
