Արարատում մեքենան բախվել է ձիով լծված սայլին․ կա 5 վիրավոր

Արարատի մարզում, սեպտեմբերի 23-ին, արտակարգ դեպք է տեղի ունեցել. ժամը 19։30-ի սահմաններում Եղեգնաձոր քաղաքի բնակիչ 45-ամյա Կարեն Շ․-ն Երեւան-Մեղրի ավտոճանապարհի 48 կմ հատվածում, Արարատ գյուղի վարչական տարածքում իր վարած «ՎԱԶ 2106» մակնիշի 35 NU 448 համարանիշի ավտոմեքենայով բախվել է Արարատ գյուղի բնակիչ 66-ամյա Աշոտ Դ․-ի վարած ձիով լծված սայլին։

Shamshyan.com-ի հաղորդմամբ, բախման հետեւանքով պոկված բեկորները շպրտվել եւ դիպել են հանդիպակած ուղեմասով ընթացող Սյունիքի մարզի բնակիչ 26-ամյա Ալիկ Հ․-ի վարած Mercedes մակնիշի 34 QC 881 համարանիշի ավտոմեքենային։ Վթարի հետեւանքով Աշոտ Դ․-ն, Կարեն Շ․-ն, վերջինիս ուղեւորներ՝ 39-ամյա Երջանիկ Ս․-ն, 18-ամյա Նաիրա Շ․-ն եւ 10-ամյա Միլենա Շ․-ն մարմնական վնասվածքներով տեղափոխվել են «Արարատ» բժշկական կենտրոն։

Հարվածի արդյունքում էլ ձին սատկել է։