Ռուսաստանի Դաշնության Խաբարովսկի երկրամասում ջրհեղեղը, ըստ նախնական տվյալների, 990 միլիոն ռուբլու վնաս է հասցրել, գրում է РИА Новости-ն` հղում անելով երկրամասի կառավարության հաղորդագրությանը:

«Երկրամասի բնակչությանն ու ենթակառուցվածքներին ջրհեհեղի հասցրած վնասի չափը, նախնական տվյալներով, գնահատվում է 990 միլիոն ռուբլի: Շրջանի ղեկավարը դիմել է ՌԴ կառավարության ղեկավար Դմիտրի Մեդվեդևին` Խաբարովսկի երկրամասին ֆինանսական օգնություն տրամադրելու խնդրանքով»,- ասվում է հաղորդագրության մեջ:

Նշվում է, որ ջրհեղեղի ալիքը վնաս է հասցրել երկրամասի 93 բնակավայրի: Աղետից տուժել է 670 բնակելի տուն, որոնցում ապրող բնակիչների թիվն ավելի քան 2 հազար է: Հիմա Խաբարովսկում տիրող իրավիճակը կարգավորվում  է, սակայն Ամուրի Կոմսոմոլսկում իրավիճակը շարունակում է լարված մնալ: Այնտեղ ջրի մակարդակը 1,5 մետրով բարձր է վտանգավորության թույլատրելի սանդղակով նախատեսված մակարդակից: 440 բնակելի տուն դեռևս հեղեղված է:

Խաբարովսկի երկրամասում ջրհեղեղի հետևանքով արտակարգ դրություն է հայտարարվել: