Կադաստրի կոմիտեի ղեկավարը չի բացառել, որ մի օր հրապարակվի խոշոր գույքերի արժեքի և դրանց սեփականատերերի ցանկ

ԱԺ Տնտեսական հարցերի մշտական հանձնաժողովում «Գույքի նկատմամբ իրավունքների պետական գրանցման մասին» ՀՀ օրենքում փոփոխություններ և լրացումներ կատարելու մասին» օրենքի նախագծի և կից ներկայացված նախագծերի փաթեթի քննարկմանը հանձնաժողովի նախագահ Բաբկեն Թունյանը Անշարժ գույքի կադաստրի կոմիտեի ղեկավար Սարհատ Պետրոսյանից հետաքրքրվեց, թե արդյո՞ք առաջիկայում հնարավոր է ցանկացած սեփականատիրոջ գույքի վերաբերյալ ինֆորմացիան բաց ձևով ունենալ:

«Եթե սկզբունքորեն այդ ինֆորմացիան առանձին մարդկանց հարցումների հիման վրա վճարովի հիմունքներով հասանելի է, ու դուք էլ չեք բացառում, որ առաջիկայում կարող է օնլայն համակարգ լինի,  ի՞նչ եք կարծում նպատակահարմար չի՞, որ ինչպես խոշոր հարկատուների ցանկն է հրապարկվում, լինի նաև խոշոր գույքերի որոշակի ցանկ և որոշ՝ շեմը գերազանցող անշարժ գույքի սեփականատերը և արժեքները նշված լինեն»,-հարցրեց նա և նշեց, որ այդ ձևով կարող են հրապարակել օրինակ 500 ամենաթանկ անշարժ գույքերի ցանկը:

Սարհատ Պետրոսյանը նշեց, որ չի բացառում դա: «Կարծում եմ՝ մի օր կհասնենք դրան, բայց տեղեկատվության բացության տրամաբանությունը այս պահին ոչ թե անձին է վերաբերում, այլ գույքին: Այսինքն՝ եթե ընդունենք, որ սրա մեջ հակակոռուպցիոն էլեմենտ ենք տեսնում, որ նախկին կամ ներկա կամ ապագա պաշտոնյան ինչ գույքերի է տիրապետում, մենք չենք տվել այդ տեղեկությունը, որովհետև դա ամբողջություն է որպես անձնական տվյալ, բայց ցանկացած գույքի վերաբերյալ հնարավորություն վճարովի հիմունքներով տրվել են»,-ասաց նա: