Համայնքապետերը խոչընդոտում են ներդրողներին․ Լոռու մարզպետը դժգոհ է
Լոռու մարզպետ Անդրեյ Ղուկասյանը դժգոհ է համայնքների ղեկավարների զգալի մասից։ Այսօր Ազգային ժողովում լրագրողների հետ զրույցում նա ասաց, որ համայնքապետերը չեն խախտում օրենքները, բայց խնդիրներ են հարուցում ներդրողների համար, իսկ եթե խախտում են օրենքը, ապա նրանց դեմ հարուցվում են քրեական գործեր։
Մարզպետն ասաց, որ հիմա 2-3 համայնքապետ ներգրավված է այդպիսի գործերով։ Նրանց թվում, ըստ Ղուկասյանի, կան և՛ քաղաքների, և՛ գյուղերի ղեկավարներ։ Հարցին՝ նրանք բոլորը Հանրապետական կուսակցությունի՞ց են, նա պատասխանեց՝ իհարկե ոչ։
Ընդհանուր խնդիրը, ըստ մարզպետի, այն է, որ երբ ներդրողը գալիս է հող վերցնելու, նրան ասում են, որ հող չկա։ Եվ պատճառը, ըստ մարզպետի, այն է, որ գյուղացիները ինչ-որ մեխանիզմով վճարում են համայնքապետին, այդ հողերն օգտագործում են որպես խոտհարք, համայնքապետն էլ չի ուզում զրկվել այդ եկամուտից։
