«Օպել»-ում հայտնաբերվել է եւս մեկ այրված դի․ մանրամասներ Արմավիրի ողբերգական վթարից

Նոր մանրամասներ են հայտնի դարձել Արմավիրի մարզի Արշալույս գյուղից դեպի Ակնալիճ տանող հատվածում տեղի ունեցած ողբերգական ավտովթարից: Նշենք, որ Հայաստանի ԱԻՆ-ում, մայիսի 5-ին, ժամը 10:54-ին 911 ծառայությանը տեղեկություն է հաղորդվել, որ Երեւան-Արմավիր ավտոճանապարհին վթարված ավտոմեքենաներն անհրաժեշտ է տեղափոխել. անվտանգության նկատառումներից ելնելով անհրաժեշտ է հրշեջ-փրկարարների օգնությունը։ Դեպքի վայր է մեկնել ԱԻՆ ՓԾ մարզային փրկարարական վարչության օպերատիվ խումբը: Փրկարարները ստուգել են գազաբալոններում գազի առկայությունը եւ ոստիկանության աշխատակիցների հետ համատեղ դրանք հեռացրել են ավտոճանապարհի երթեւեկելի հատվածից: «Opel» մակնիշի ավտոմեքենայում հայտնաբերվել է նաեւ Կ.Գ.-ի (ծնված 1991 թ.) այրված դին: Ավելի վաղ հայտնել էինք, որ մայիսի 5-ին, ժամը 00:00-ին 911 ծառայությանն ահազանգ է ստացվել, որ Արմավիրի մարզի Արշալույս գյուղից դեպի Ակնալիճ տանող հատվածում այրվում է ավտոմեքենա (գազի բալոններով բեռնված): Պարզվել է, որ Էջմիածին-Արմավիր ավտոճանապարհի 10 կմ-ի ձախակողմյան հատվածում բախվել են գազի բալոններով բարձված (10 հատ, տարողությունը չի հաջողվել պարզել) «ԶԻԼ-130» (վարորդ՝ Ա.Ե., ծնված 1982 թ.) եւ «Opel» (վարորդ՝ Կ.Գ., ծնված 1993 թ.) մակնիշների ավտոմեքենաները: Բախման հետեւանքով բալոնները պոկվել եւ ընկել էին երթեւեկելի հատված, իսկ մեկ բալոն պայթել էր եւ բռնկվել: Հրդեհը մեկուսացվել էր ժամը 00:50-ին, մարվել 01:20-ին: Ավտոմեքենաներն ամբողջությամբ այրվել էին: Տեղազննման արդյունքում հայտնաբերվել էր անձը չպարզված քաղաքացու այրված դի: