ՏԵՍԱՆՅՈՒԹ. Բերման է ենթարկվել 16-ամյա տղային թմրամիջոց փոխանցելիս
Ոստիկանության Վաղարշապատի բաժնից ծառայողներն ապօրինի թմրաշրջանառության վերաբերյալ ստացել են տեղեկություններ, ըստ որոնց՝ Էջմիածնում ապրող 32-ամյա Գառնիկ Վ.-ը պահում է թմրամիջոց, օգտագործում է և իրացնում։ Այս մասին տեղեկանում են ՀՀ ոստիկանության պաշտոնական կայքից։
Ոստիկանության Վաղարշապատի բաժնում հարուցվել է քրեական գործ։ Նույն օրը քրեական հետախույզները հայտնաբերել են Գառնիկ Վ.-ին և բերման ենթարկել բաժին։ Նա բերման ենթարկվեց Երևանում 16-ամյա մի տղայի թմրամիջոց փոխանցելիս։ Գառնիկ Վ.-ի անձնական խուզարկությամբ հայտնաբերվել է մանրացված, չորացված յուրահատուկ հոտով կանեփանման զանգված, ընդանուր՝ 15 գրամից ավելի քաշով։
«Հարուցված քրեական գործի շրջանակներում, շարունակելով օպերատիվ հետախուզական միջոցառումները՝ պարզեցինք, որ Գառնիկ Վ.-ը հայտնաբերված թմրանյութը ձեռք է բերել Էջմիածին քաղաքի բնակիչ Արման Տ.-ից։ Դատարանի որոշմամբ՝ խուզարկվել է Արման Տ.-ի բնակարանը, որի արդյունքում՝ հայտնաբերվեց 100 գրամ ընդանուր քաշով՝ մանրացված, չորացված մարիխուանայի նմանվող զանգված»,- հայտնել է օպերլիազոր Գևորգ Միքայելյան։
Արման Տ.-ը իր բնակարանից բերման է ենթարկվել ոստիկանության Վաղարշապատի բաժին։ Ոստիկանությունում հարուցված քրեական գործն ու կասկածանքով բերման ենթարկվածները հանձնվել են տարածքային քննչական բաժին։ Դեպքի հանգամանքները նախաքննությամբ պարզվում են։
