«Կասկադյորական» ավտովթար Արարատի մարզում. կան հոսպիտալացվածներ

Երեկ՝ ապրիլի 28-ին, խոշոր ավտովթար է տեղի ունեցել Արարատի մարզում։ Ժամը 20։35-ի սահմաններում Արարատի մարզի Արևաբույր գյուղի բնակիչ՝ 35-ամյա Նշան Հարությունյանը իր վարած Nissan X Trail մակնիշի 35 MC 908 համարանիշի ավտոմեքենայով Մրգավետ գյուղի Երևանյան խճուղու սկզբնամասում բախվել է Մխչյան գյուղի բնակիչ՝ 32-ամյա Արտուշ Գյուլամիրյանի վարած ВАЗ 2109 մակնիշի 34 QՍ 898 համարանիշի ավտոմեքենային։ Ինչպես դեպքի վայրից հայտնում է ֆոտոլրագրող Գագիկ Շամշյանը, այնուհետև առաջ է ընթացել, բախվել նույն վայրում գործող Մրգավետ գյուղի բնակիչ, անհատ ձեռներեց, 42-ամյա Արամ Գևորգյանին պատկանող խանութ-սրահի պատին, պատուհաններին և կողաշրջվելով՝ մասամբ հայտնվել ճանապարհի մեջտեղում։ Վթարի հետևանքով վարորդ Ն. Հարությունյանն ու ուղևոր՝ համագյուղացի, 57-ամյա Կարապետ Հարությունյանը մարմնական վնասվածքներով տեղափոխվել են «Էրեբունի» բժշկական կենտրոն։