Ռուսաստանում երկու փոքրիկի մահվան գործով դատապարտվել է հայաստանցի մայրը

Ռուսաստանում Վորոնեժի մարզի բնակչուհին պայմանական ազատազրկման է դատապարտվել երեք և երկու տարեկան դուստրերի մահվան պատճառ դառնալու մեղադրանքով։ Այս մասին հայտնում է ՌԻԱ Նովոստին` հղում անելով ՌԴ Քննչական կոմիտեի Քննչական վարչությանը։ Երեխաների դիակները հայտնաբերել են նոյեմբերի 16–ին «Պոդվորիե» ԲԲԸ–ի ֆերմայի բնակելի տարածքում։ Քննական տվյալներով` 2018 թվականի նոյեմբերի 16–ին 27–ամյա կինը, որն ամուսնու հետ Հայաստանից տեղափոխվել է Վորոնեժի մարզ, տնից գնացել է ու մենակ թողել երեխաներին։ Այդ սենյակում վառարան է եղել, որի կրակից այրվել է սպիտակեղենը։ Աղջիկները մահացել են շմոլ գազից թունավորվելու հետևանքով։ Մոր հանդեպ քրեական գործ է հարուցվել անզգուշությամբ երկու անձանց մահ պատճառելու հոդվածով։ Մարզի դատախազության տվյալներով` բնակելի տարածքում ինքնաշեն վառարան է դրված եղել։ Աղջիկների ծնողները Հայաստանի քաղաքացիներ են։ Նրանք 2018 թվականի ապրիլին են Ռուսաստան մեկնել ու միգրացիոն հաշվառման կանգնել։