Երթևեկության կանոնների պահպանության բալային համակարգի հետ կապված օրենսդրական նախաձեռնությունը մշակվում է: Այս մասին ֆեյսբուքյան իր ուղիղ եթերի ժամանակ հայտարարեց ՀՀ վարչապետ Նիկոլ Փաշինյանը։ Նա նկատեց, որ կան օրենսդրական նախաձեռնություններ, իրենք ասել են, սակայն այս 10 ամսվա ընթացքում դեռևս որպես օրենք չեն ընդունվել։ Նա գիտակցում է, որ սա կարող է քննադատության ենթարկվել, բայց նկատում, որ միջազգային պրակտիկայում էլ կարևոր օրենքը «շպփ-թըփ» չի ընդունվում։ «Բալային համակարգի հետ կապված աշխատանքն ընթանում է, և ինձ տրված տեղեկանքով առաջիկա մեկ ամսվա մեջ արդեն փաթեթը կուղարկվի Ազգային ժողով»,- ասաց Փաշինյանը: «Ասում են, որ հանձնարարական չեմ տվել, բայց այն, որ ես կառավարության նիստում այս մեխանիզմի անհրաժեշտության մասին հայտարարություն եմ անում, բավական չէ, բա հանձնարարականը պոզով-պոչո՞վ է լինում։ Սա մեր թերացումն է, բայց էլի եմ ասում, որ եթե կառավարության նիստում հայտարարում եմ, պետք է ոստիկանության համապատասխան մարմիններն արձանագրեին, որ դա հանձնարական է: Եվ ես հիմա ուղիղ եթերում հանձնարարում եմ: Արդեն 10 ամիս ուշացել եք և չեք կատարել այդ հանձնարարականը»,- եզրափակեց Նիկոլ Փաշինյանը։