Նախկին պայմանագրային զինծառայող Դավիթ Հակոբյանը 3 օր անց դադարեցրել է հացադուլը. ՊՆ–ն խոստացել է օգնել

ՊՆ նախկին պայմանագրային զինծառայող Դավիթ Հակոբյանը, որը երեք օր առաջ հացադուլ էր հայտարարել ՊՆ կենտրոնական մասնաշենքի դիմաց, քիչ առաջ դադարեցրել է հացադուլը եւ վերադարձել տուն։ «Արդեն տուն եմ վերադարձել, ինձ Պաշտպանության նախարարությունից խոստացել են, որ երկուշաբթի իմ բոլոր հարցերը կկարգավորվի»,– NEWS.am-ի հետ զրույցում ասաց նա։ «Իրենք են ինձ դարձրել հաշմանդամ, ինձ ասում էին, որ ինձանից է, սակայն ես համապատասխան փաստաթուղթ ունեմ, որ բժշկի մեղավորությունն է»։ Նախկին զինծառայողը պահանջում է, որ իրեն ուղարկեն Գերմանիա բուժման: Այս խնդրին Facebook-ի իր էջում անդրադարձել է Պաշտպանության նախարարի մամուլի խոսնակ Արծրուն Հովհաննիսյանը՝ նշելով, որ Դավիթ Հակոբյանի հիվանդությունը չի զարգացել մարտական գործողություններին մասնակցելիս, ուստի նա չի կարող օգտվել արտերկրում բուժման իրավունքից: Հովհաննիսյանը մանրամասներ ներկայացրել է թե ինչպես է խնդիրը առաջացել, ինչպիսի հիվանդություններ են առաջ եկել, ինչ վիրահատություններ են արվել, ինչ բուժումներ են կատարվել: Նաեւ թե որքան պարբերականությամբ եւ որքան ֆինանսական օժանդակություն է հատկացվել նախկին զինծառայողին: